SHBA, Obama: Urime Sudanit të Jugut për pavarësinë nga veriu. Edhe Al Bashir e pranon
ndarjen.
(08.02.2011 RV)Presidenti Barak Obama e përgëzoi Sudanin jugor pas njoftimit
zyrtar të fitores së referendumit për pavarësinë nga Sudani verior. “Në emër të popullit
të SHBA-ës e përgëzoj popullin e Sudanit jugor për referendumin e suksesshëm në të
cilin shumica dërrmuese zgjodhi pavarësinë”. Kështu u shpreh presidenti Obama në një
deklaratë për shtyp. Mes tjerash presidenti Obama vuri në dukje se SHBA do ta njohin
Sudanin jugor si shtet të pavarur, duke filluar nga korriku i ardhshëm. Po ashtu
pavarësinë e jugut nga veriu e njohti dhe e pranoi edhe presidenti i Sudanit, Omar
Al-Bashir. Ndërkaq, Uashington njoftoi se pas zhvillimeve të fundit në këtë vend afrikan,
SHBA-ës do të ndërmarrin hapa për heqjen e Sudanit nga lista e zezë e shteteve që
financojnë terrorizmin.