“Двор язычнікаў” стане пляцоўкай дыялогу католікаў і няверуючых
Папская рада
па культуры распрацавала новы праект пад назвай “Двор язычнікаў”. Мэта праекта - уцягнуць
вернікаў і няверуючых у дыялог. “Двор язычнікаў” будзе ўрачыста адкрыты 24-25 мая
ў Парыжы.
Назва праграмы ўзята з выказвання Бэнэдыкта XVI. У 2009 годзе Папа
заявіў, што Касцёлу трэба “нешта накшталт “Двара язычнікаў”, які быў у Ерузалемскім
Храме: самы першы ўзровень набліжэння да Бога, для тых, хто цікавіцца”.
Пляцоўкі
для правядзення сустрэч далі ЮНЕСКА, Сарбона і Французская Акадэмія. У ходзе гэтых
сустрэч будзе паказаны відэазварот Бэнэдыкта XVI. Сярод гасцей сустрэчы чакаюцца былы
прэм'ер-міністр Вялікабрытаніі Тоні Блэр, які перайшоў у каталіцтва, былы прэм'ер-міністр
Італіі Джуліяна Амата. Акрамя таго, запрошаныя два французскіх міністры: вышэйшай
адукацыі - Валеры Пекресс і культуры - Фрэдэрык Мітэран.
Прэзентацыя праекта
“Двор язычнікаў” адбудзецца 12 лютага ў Балонні ў прысутнасці кіраўніка Папскай рады
па культуры кардынала Джанфранка Равазі.
Па задуме арганізатараў, сустрэча
ў Парыжы павінна стаць толькі пачаткам дыялогу паміж вернікамі і атэістамі. У рамках
праекта плануецца правядзенне такіх сустрэч у Тыране і Стакгольме. У цяперашні час
ідзе праца над стварэннем сайта “Двор язычнікаў”.