Գանատա։ Խաժակ արք. Յակոբեանի նախագահութեամբ եւ հիւրընկալութեամբ Ազգային վարչութեան,
առաջնորդարանի սրահին մէջ, տեղի ունեցած «Առաջնորդարանի բարեկամներու ընթրիքի՝՝ աւարտին
բարերարուհի՝ Արուս Էհրամճեան ստացաւ «Կիլիկեան իշխանուհի»ի շքանշանը: «Առաջնորդարանի
բարեկամ»ներու նուիրատուութիւնները հիմքը կը կազմեն առաջնորդարանի հիմնադրամին եւ տարեկան
շարք մը նախաձեռնութիւններու, որոնց միջոցով առաջնորդարանը կրնայ փոխանցել սերունդներուն
մեր դարաւոր ժառանգութիւնն ու աւանդութիւնները եւ մեր ազգային գոյութեան կարեւորագոյն
հիմունքները: Առաջնորդը յատուկ շնորհակալութիւն յայտնեց նուիրատուներուն եւ գնահատեց
անոնց շարունակական օժանդակութիւնը՝ առաջնորդարանին ու անոր ծրագիրներուն եւ գործունէութեանց
իրականացման համար իրենց ցուցաբերած աջակցութեան: Նշենք թէ՝ բժիշկ Վաղարշ Էհրամճեան
արդէն ստացած էր «Կիլիկեան իշխան»ի շքանշանը՝ Ս. Յակոբ առաջնորդանիստ մայր եկեղեցւոյ
50-ամեակի տօնակատարութեան ընթացքին: Սոյն շքանշանը կը յանձնուի Մեծի Տանն Կիլիկիոյ Արամ
Ա. վեհափառ հայրապետին օրհնաբեր կոնդակով: