Sot, 6 shkurt, është e diela e pestë e vitit kishtar, cikli A. Leximet e sotme
na ndihmojnë të kuptojmë se Krishti i ringjallur është drita, që fiton mbi errësirën
e mëkatit e të vdekjes. Po sot, përkujtohen edhe shën Pal Miki me shokë, martirë japonezë
dhe shën Dorotea, virgjër e martire.
Të hënën, më 7 shkurt, Kisha Katolike
kremton festën e shën Partenit, shën Rikardit e të Lumit Piu IX. Dishepujve që nuk
arrijnë ta kuptojnë Jezusin, shën Marku ungjilltar i kundërvë ata njerëz, që e njohin
menjëherë Krishtin dhe ngarendin drejt Tij, pasi e shihnin tek Ai “shpëtimin”. Ungjilli
i kësaj dite na i hap sytë për të kuptuar se ku dhe çfarë duhet të shohim.
Më
8 shkurt, ditën e martë, përkujtohen shën Jeronim Emiliani e shën Jozefina
Bakita. Leximet e kësaj dite na mësojnë se ligjet rituale janë të rëndësishme e duhen
respektuar, por nuk duhet të bëhen pretekst për të kapërcyer Urdhërimet e Tënzot.
Kjo do të ishte hipokrizi.
Bekoje o Zot, shpirtin tim. Ungjilli i së mërkurës,
9 shkurt, na tërheq vëmendjen drejt faktit se edhe nëse gjërat e jashtme mund
të na prishin, nuk duhet të harrojmë se problemi i vërtetë është brenda, në korruptimin
e zemrës. Këtë ditë, Kisha kujton shën Apolloninë e shën Maronin.
Më datë 10
shkurt, ditën e enjte, përkujtohet shën Skolastika, virgjër, shën Silvani dhe
i Lumi Alojze Stepinac. Ndërsa shumë ndjekës të Jezusit janë thjesht formalë e vërejnë
edhe gjënë më të vogël që s’shkon, sjellja këmbëngulëse e gruas pagane shpreh karakteristikën
thelbësore të fesë, që shpesh na mungon. Ungjilli i ditës, na fton pra të mos u japim
tepër rëndësi rregullave e ligjeve, por zemrës së pastër.
Të premten, 11
shkurt, Kisha Katolike kremton festën e Zojës së Lurdës, Zoja e mrekullive dhe
e shërimit të sëmundjeve. Leximet biblike na japin të kuptojmë se është i Lum e pra,
i shëruar, ai njeri të cilit i janë falur mëkatet. Vetëm Jezusi na liron, na bashkon
e na shtyn t’i thurim lavde veprave të Zotit. 11 shkurti është edhe Dita botërore
e të Sëmurit.
Më 12 shkurt, përkujtohen Shenjtorët Martirë të Abitenit
dhe shën Benedikti i Anianit. Leximet e ditës vënë në pah vëmendjen që i jepet Eukaristisë
në predikimin e apostujve. Është një mrekulli, që zbulon mëshirën e Jezusit për ne
dhe nevojën tonë për t’u ushqyer me bukën e jetës. Në këtë ditë, Radio Vatikanit feston
80-vjetorin e themelimit.
E diela e ardhshme, e gjashta e vitit kishtar, na
kujton shën Martinianin e shën Beninjin.