(04.02.2011 RV)Dimë pak për Martirin. Sipas Martiriologut Romak, u dënua në
mënyrë shumë mizore. U la për një kohë të gjatë pa ngrënë e pa fjetur e, pasi i kishin
shterruar të gjitha forcat, u flak në një humnerë. I pësoi të gjitha mundimet për
fenë e Krishtit, duke arritur fitoren më të madhe përballë tiranit e urdhërave të
tij mizore. Njeriu nuk mund të arrijë një fitore më të lavdishme, sesa të mundë tundimin
për të shpëtuar korpin, duke humbur shpirtin. Fakti që kujtohet çdo vit e tregon këtë.
Trupi i tij u mbart me nderim të thellë nga humnera, në Katakombet e Romës, në Rrugën
Apia, ku pushon në paqe. Emri Eutiki, që tirani deshi ta shlyente nga lista e të gjallëve,
shkruhet mbi një rrasë mermeri në udhët e nëndheshme të Romës, e për amshim, në Librin
e Jetës.