Papa Komunitetit Emanuel: në një botë shpesh të çorientuar, sillni dritën e Krishtit
për të gjithë
(03.02.2011 RV)Gjejeni forcën në
Eukaristi për t’u shpallur Fjalën e Zotit të gjithë njerëzve: kështu u tha Papa anëtarëve
të Komunitetit Emanuel, të cilët i priti sot në audiencë, me rastin e 20 vjetorit
të vdekjes së themeluesit të kësaj bashkësie, Pierre Goursat. Kujtojmë se kjo bashkësi
punon e jep kontributin e saj edhe në Shqipëri. Ati i Shenjtë nënvizoi se në botën
e sotme ndihet nevoja e një zelli të ri apostolik, rrënjosur në jetën e vërtetë eukaristike: “Në
një botë shpesh të çorientuar e në kërkim të arsyeve të reja për jetën, dria e Krishtit
duhet t’u çohet të gjithëve”. Që këtej, ftesa e Benediktit XVI për t’u bërë
misionarë të zjarrtë ndër njerëzit e kohës sonë. “Duhet të keni etje për ta shpallur
Fjalën e Zotit”, i inkurajoi Papa meshtarët dhe laikët e Komunitetit Emanuel. Urgjenca
e përhapjes së Ungjillit, theksoi Ati i Shenjtë, ndihet sidomos në mesin e familjeve,
shpesh të ndara, në mesin e të rinjve e në ambientet intelektuale: “Kontribuoni
në rinovimin nga brenda të zellit apostolik nëpër famulli, duke zhvilluar më tej orientimet
e tyre shpirtërore e misionare”. Papa i këshilloi anëtarët e bashkësisë të
tregojnë kujdes të veçantë për ata që kthehen në Kishë, pasi e kanë braktisur atë
e për ata, që nuk kanë formim të thellë të krishterë. “Ndihmojini – tha Benedikti
XVI – ta rrënjosin fenë në një jetë vërtet teologale, sakramentore dhe kishtare”.
Më pas, duke lavdëruar impenjimin e bashkësisë në vendet me popullsi në nevojë, uroi
që dëshmia e bamirësia e anëtarëve të Komunitetit Emanuel të kthehet në forcë për
të ndërtuar një botë më të drejtë e më vëllazërore. Së fundi, Papa vuri theksin në
rëndësinë e bashkimit ndërmjet anëtarëve: “Ky bashkim nuk është një solidaritet
i thjeshtë njerëzor ndërmjet anëtarëve të së njëjtës familjeje shpirtërore, por bazohet
në marrëdhëniet tuaja me Krishtin e në impenjimin e përbashkët për t’i shërbyer Atij”. Jeta
në bashkësi, përfundoi Benedikti XVI, është për shoqërinë “dëshmia e gjallë e dashurisë
vëllazërore, që duhet t’u japë shpirt të gjitha marrëdhënieve njerëzore”.