Aktualiteti i jetës rregulltare, sipas motër Enrika Rozanës

(02.02.2011 RV)Në përfundim të audiencës së përgjithshme, Benedikti XVI përshëndeti të gjithë ata që, duke bërë kushtet e pastërtisë, të varfërisë e të bindujes, ecin në rugën e shenjtërisë”, domethënë të gjithë rregulltarët e botës, në Ditën që u kushtohet. Ndërmjet tyre, motra Enrika Rozana, zëvendës-sekretare e dikasterit të Vatikanit për njerëzit e përkushtuar, në mikrofonin tonë:


Përgjigje: - Jeta rregulltare, jetë e ecjes në gjurmët e Krishtit, është dëshmi e vetë mësimeve të Ungjillit. Kush e zgjedh këtë rrugë, do të thotë se ka vendosur të jetojë plotësisht në përkim me Lajmin e mirë, me kërkesat, gëzimin, premtimet, arsyet dhe shpresën e krishterë.

Pyetje: - Gjon Palin II e shikon kushtin e pastërtisë, të varfërisë e të bindjes si sfidë profetike e si ilaç shpirtëror në kohën tonë. Ç’mund të na thoni për gjendjen aktuale të jetës rregulltare?

Përgjigje: - Duke lexuar brenda e jashtë statistikave, që flasin për jetën rregulltare në Kishë në vende të ndryshme të botës, diku në rënie e diku në lulëzim, dëshiroj të them se jeta rregulltare sot jeton një epokë të re, në të cilën aktualizohet modeli i saj historik. Rregulltarët, duke pasur parasysh detyrën e tyre kryesore, kumtimin e Fjalës së Zotit, sot ecin përkrah realiteteve të tjera të Kishës, me hapin e kulturave të ndryshme të botës.

Pyetje: - Flitet për urgjencë edukative, që ndikon shumë edhe në thirrjet e reja për t’ia kushtuar jetën Zotit, në të gjitha format e përkushtimit. Cilat janë strategjitë më të përshtatshme, që e ndihmojnë njeriun të kuptojë se jeta vetë është thirrje, është dhuratë e Zotit?

Përgjigje: - Më duket se, në radhë të parë, duhet ecur në një rrugë, ku ke gjithnjë përkrah tjetrin, me ‘T’ të madhe. Domethënë, Zotin. Të rinjtë e botës së sotme flasin një gjuhë të copëzuar e kalimtare; ne kemi nevojë për diçka që ka aromën e amshimit, kemi nevojë jo për troje të lëvizshme, por për shkëmbin e fortë, ku të rinjtë mund t’i mbështesin mirë këmbët, pa frikën e rrëzimit nga çasti në çast.

Pyetje: - Është akoma aktuale jeta rregulltare, përkushtimi i plotë ndaj Zoti e të afërmit?

Përgjigje: - Do të thosha se është më se aktuale, pikërisht sepse të rinjtë e sotëm kërkojnë kuptimin e plotë të jetës. E kush mund t’i japë kuptim jetës, më shumë se Jezusi? Kush mund t’i ndihmojë të ecin në rrugën e drejtë, më mirë se Ai? Kush mund t’u dhurojë atë lumturi, që di ta dhurojë vetëm Zoti? Natyrisht, Krishti nuk premton jetë të lehtë, por të lumtur, sigurisht. E kjo, sepse thirrja vërtet dhurohet, por edhe fitohet, duke ua vënë mirë veshin kumteve të ndryshme, që vijnë nga toka e, sidomos, nga qielli!