“L'Osservatore Romano” узгадвае Дзень памяці ахвяр Халакоста
“L'Osservatore Romano”
у Міжнародны дзень памяці ахвяр Халакоста ўзгадвае італьянскага абата Джузэппэ Рыччоцці,
які ў сваіх кнігах і публікацыях у сярэдзіне 30 гадоў ХХ стагоддзя змагаўся з антысеміцкімі
тэорыямі. Большасць яго публікацый, як падкрэслівае ватыканскае выданне, з’явілася
менавіта на яго старонках.
На Божае Нараджэнне 1937 года святар пісаў, што
“распаўсюд антысемітызму ў Еўропе не з’яўляецца дэманстрацыяй духа, але экзальтацыяй
сілы цела над духам... найбольш драматычныя праявы антысемітызму, новага і таго, што
адраджаецца, прыносіць не столькі барацьба з палітыкай Ізраіля, колькі з рэлігіяй
Ізраіля”. “Яго ворагі, - сцвярджаў абат Рыччоцці, - з’яўляюцца больш язычнікамі чым
антысемітамі, якія абагавілі людзей і каштоўнасці свету, каб абвясціць вайну Богу
і рэлігійным каштоўнасцям”.
Газета цытуе словы абата, які пасля вайны сказаў,
што “адзін з апошніх асобнікаў яго бестселера “Жыццё Езуса Хрыста” купіў Бэніто Муссаліні,
які прачытаў кнігу, калі быў сасланы на востраў Понца: здаецца, аднак, што прачытанне
не дало ніякага эфекту”, - сцвярджаў абат Джузэппэ Рыччоцці.