Papa: bashkimi i të krishterëve është imperativ moral, duhet ecur përpara me dialog
“Udha” drejt bashkimit të të krishterëve “duhet të ndjehet si urdhër moral”, si “përgjigje
ndaj thirrjes së qartë e të saktë të Zotit tonë Jezu Krisht”. Kjo është thirrja që
Papa Benedikti XVI bëri gjatë kremtimit të Lutjeve Mbrëmësore në bazilikën romake
të Shën Palit, që kryesoi personalisht Ati i Shenjtë në festën e Kthimit të Shën Palit,
me rastin e mbylljes së Javës së Lutjes për Bashkimin e të Krishterëve. Në liturgjinë
e kësaj Mbrëmësoreje morën pjesë edhe përfaqësues të Kishave tjera të krishtera e
të bashkësive kishtare të pranishme në Romë. “Lypet fituar mbi tundimin e dorëzimit
e të pesimizmit”, tha Papa mes tjerash gjatë homelisë. “Detyra jonë është të vijojmë
me pasion e bindje udhën tonë drejt cakut të bashkimit me një dialog serioz e rigoroz
për të përthelluar thesarin e përbashkët teologjik, liturgjik e shpirtëror; me njohjen
reciproke; me formimin ekumenik të brezave të ri e, sidomos, me kthimin e zemrave
e me lutje drejtuar Hyjit”. Sipas Atit të Shenjtë Racinerg, “duhet të jemi mirënjohës”,
sepse “gjatë dekadave të fundit”, lëvizja ekumenike “ka bërë hapa të rëndësishëm përpara,
hapa që kanë mundësuar arritjen e përkimeve e të konsensuseve mbi pika të ndryshme,
duke zhvilluar mes Kishave e Bashkësive kishtare marrëdhënie vlerësimi e respekti
të anasjelltë, si dhe një bashkëpunim konkret para sfidave të botës bashkëkohore”.
“E dimë mirë – vijoi Papa – se jemi ende larg nga ai bashkim për të cilin Krishti
është lutur e shkëlqimin e të cilit e gjejmë në bashkësinë e parë të Jerusalemit”.
E sipas Benediktit XVI, “bashkimi në të cilin Krishti, përmes Shpirtit të vet e thërret
Kishën, nuk realizohet vetëm në nivelin e strukturave organizative, por pasqyrohet,
në një nivel shumë të thellë, si bashkim që shprehet në “rrëfimin e një feje të vetme,
në kremtimin e përbashkët të kultit hyjnor e në përkimin vëllazëror të familjes së
Zotit”, pohoi Papa duke cituar dekretin e Koncilit të II të Vatikanit, ‘Unitatis redintegratio’.