Бэнэдыкт XVI да рымскай паліцыі: “сумяшчайце прафесіяналізм з глыбокім гуманізмам”
Сёння, 21 студзеня
Папа Бэнэдыкт XVI сустрэўся з кіраўніцтвам і супрацоўнікамі рымскай паліцыі. Падчас
гэтага спаткання Святы Айцец звярнуўся з прамовай, у якой адзначыў, што хуткія грамадскія
перамены спрыяюць узнікненню пачуцця небяспекі. Гэта звязана з адмаўленнем ад этычных
нормаў, якія ляжаць у аснове прававой і маральнай дзейнасці людзей. “Новыя выклікі,
якія з’яўляюцца на даляглядзе патрабуюць, каб Бог і чалавек зноў спаткаліся, каб грамадства
і публічныя ўстановы адшукалі сваю “душу”, свае маральныя і духоўныя карані, каб умацаваць
этычныя і прававыя цноты, якія звязаны з практычнай дзейнасцю”, - сказаў Святы Айцец.
Папа нагадаў, што хрысціянская вера і Касцёл няспынна спрыяюць пашырэнню супольнага
дабра і сапраўднага чалавечага развіцця, сведчаннем чаму з’ўляецца душпастырская праца
ў аддзяленнях паліцыі, якая праводзіцца ў Італіі на падставе канкардату.
Бэнэдыкт
XVI заклікаў прысутных на аўдыенцыі паліцэйскіх, каб яны давалі добры прыклад пазітыўнай
сувязі паміж здаровай свецкасцю і хрысціянскай верай. Эфектыўнасць працы паліцэйскіх
“залежыць ад сувязі паміж прафесіяналізмам з глыбокім гуманізмам, выкарыстаннем сродкаў
бяспекі і асаблівым запасам чалавечых талентаў, такіх як цярплівасць, трыванне ў добрым,
самаахвярнасць і гатоўнасць выслухаць іншых. Гэта служыць людзям, асабліва тым, якія
перажываюць цяжкасці”, сказаў Папа.
На заканчэнне сустрэчы Пантыфік заклікаў
паліцэйскіх да чытання і разважання Божага слова, якое з’яўляецца крыніцай і натхненнем
да дзейнасці.