Кардынал Нікора прызначаны старшынёй Упраўлення фінансавай інфармацыі Ватыкана
Святы Айцец прызначыў
старшынёй ватыканскага Упраўлення фінансавай інфармацыі кардынала Аціліё Нікору і
чатырох членаў яго Кіраўнічай рады. Мэтай гэтай, створанай 30 снежня мінулага года
ўстановы, з’яўляецца забеспячэнне большага нагляду і кантролю ў мэтах прадухілення
ў Дзяржаве Ватыкан, Рымскай Курыі і ўсіх арганізацыях, якія належаць да Апостальскай
Сталіцы, фінансавых махінацый і адмывання грошай.
73-гадовы кардынал Нікора
ад 1 кастрычніка 2002 году з’яўляецца старшынёй Адміністрацыі маёмасці Апостальскай
Сталіцы, а раней адказваў у італьянскім епіскапаце за пытанні ўласнасці. Ён быў таксама
старшынёй італьянскай "Карытас". Ян Павел II ўключыў яго ў Калегію кардыналаў 21 кастрычніка
2003 г.
Членамі Кіраўнічай рады былі прызначаны прафесары Клаўдыё Б'янкі, Марчэла
Кондэмі, Джузэпэ Далла Торэ і доктар Чезаре Тэста. Гэта вядомыя італьянскія юрысты,
якія спецыялізуюцца ў пытаннях банкаўскага права.
“Апостальская Сталіца падтрымлівае
намаганні міжнароднай супольнасці па барацьбе з незаконнымі фінансавымі аперацыямі
і ўводзіць у сваю дзейнасць прынятыя ў свеце стандарты па прадухіленні і барацьбе
з увядзеннем у абарачэнне даходаў ад злачыннай дзейнасці”, - заявіў кіраўнік Залі
Друку Апостальскай Сталіцы кс. Фэдэрыка Ламбардзі.