Presidenti Shqipërisë Topi dekreton ndryshimet në qeveri.
Presidenti i Shqipërisë, Bamir Topi, dekretoi sot ndryshimet në kabinetin qeveritar,
pas dorëheqjes së kryetarit të Lëvizjes Socialiste për Integrim, Ilir Meta, nga posti
i zv.kryeministrit dhe ministrit të Ekonomisë, Tregtisë dhe Energjetikës. Sipas zyrës
së shtypit pranë presidencës, Topi dekretoi shkarkimin e Metës nga posti i zv.kryeministrit
dhe ministrit të Ekonomisë, Tregtisë dhe Energjetikës. Gjithashtu, Presidenti dekretoi
emërimin e z. Edmond Haxhinasto, si zv.kryeministër dhe ministër i Punëve të Jashtme
dhe emërimin e z. Nasip Naço, ministër të Ekonomisë, Tregtisë dhe Energjetikës. Pas
dorëheqjes së Ilir Metës nga postet qeveritare (14 janar), kryesia e LSI-së propozoi
në postin e ministrit të Ekonomisë, Tregtisë dhe Energjetikës, z. Nasip Naço, i cili
aktualisht mban postin e nënkryetarit të parlamentit, ndërsa në vend të tij, propozoi
z. Vangjel Tavo. Gjithashtu, kryesia e LSI-së propozoi që ministri i Jashtëm, Edmond
Haxhinasto, të marrë edhe postin e zv.kryeministrit. Menjëherë pas këtij vendimi,
Kryeministri Berisha miratoi propozimet e paraqitura dhe i përcolli ato për dekretim
tek Presidenti i Republikës.