Papa në fjalimi drejtuar “Lëvizjes neokatekumenale” kujton rëndësinë e misionit në
jetën e Kishës. Njerëzimi, një familje e vetme.
(17.01.2011 RV)Benedikti XVI priti sot paradite në Sallën e Palit VI, në Vatikan,
nismëtarët e Lëvizjës neokatekumenale, Kiko Arguelo, Karmen Hernandez dhe Atë Mario
Peci, të shoqëruar nga ekipi endacak i drejtuesve të Lëvizjës kishtare, që vepron
në më se 120 kombe. Në audiencë merrnin pjesë edhe 78 rektorë të seminareve të Nënës
së Shëlbuesit, priftërinj e seminaristë, familje në mision, bashkësi misionarësh,
misionarë në mes popujve e katekistë të Romës e të Lacios. Gjatë audiencës, Ati
i Shenjtë nisi 230 familje të reja për mision në gjirin e 43 kombeve, në të pesë kontinentet,
duke përuruar trembëdhjetë ‘misione ndërmjet popujve’ në Evropë (Gjermani, Austri,
Maqedoni, Francë, Ukrainë, Suedi, Hungari) dhe në Amerikën e Jugut (Venezuelë). Çdo
grup misionar “ndërmjet popujve” përbëhet nga një meshtar, i shoqëruar prej tri-katër
familjesh me shumë fëmijë të cilat, sipas kërkesës së një ipeshkvi, marrin mandatin
për të ugjillëzuar zona të ndryshme të botës, të krishtera ose jo.