Kryeipeshkvi Veliò në Ditën Botërore të Emigrantëve: duhet të jemi të vetëdijshëm
se bëjmë pjesë në të njëjtën familje njerëzore
(17.01.2011 RV)Siç kujtoi Papa në Lutjen e djeshme të Engjëllit të Tënzot,
Kisha Katolike kremtoi Ditën e 97-të Botërore të Emigrantit e të Refugjatit. Tema
e sivjetme ishte “Një familje e vetme njerëzore”, zgjedhur nga Benedikti XVI për ditën
e themeluar nga Papa Piu X në vitin 1914. Por cilat janë vendet më të interesuara
për fenomenin e emigrimit e cilat janë shkaqet e këtij eksodi? Përgjigjet në mikrofonin
tonë, kryetari i Këshillit Papnor për Baritorinë e Emigrantëve dhe të Endacakëve,
imzot Antonio Maria Veliò: Sipas të dhënave
të fundit të Kombeve të Bashkuara, emigrantët e rregullt në botë janë rreth 214 milion.
Vlerësohet se 15-20 milion të tjerë janë pa dokumenta. Këtyre u duhen shtuar 15 milion
refugjatë, ndërsa emigrantët brenda vendit të tyre, sidomos për shkak të dhunimit
të të drejtave të njeriut, arrijnë në rreth 27 milion. Rajonet, nga ku nisen më shumë
njerëz, janë pa dyshim, Afrika subsahariane, Lindja e Mesme, krejt Azia Juglindore
e shumë vende të Amerikës Latine. Pra, gati të gjitha vendet janë prekur nga ky fenomen
e mund të jenë zona origjine, destinacioni, apo tranzicioni të emigrantëve. Shkaqet
janë nga më të ndryshmet. Në nivel lokal e kombëtar: kërkimi i një të ardhmeje më
të mirë, varfëria, papunësia, krizat ekonomike e politike, konfliktet politike e shoqërore,
uria e luftrat. Në nivel botëror, dua të kujtoj sidomos çekuilibrin ekonomik ndërkombëtar,
degradimin e ambientit, dhunimin e të drejtave të njeriut, mungesën e paqes e të sigurisë. Në
këtë skenar, cilat janë situatat, që e shqetësojnë më shumë Kishën dhe dikasterin,
që ju drejtoni në Vatikan? Tashmë, prej javësh, ndjekim me ankth fatin e shumë
emigrantëve me kombësi eritree, etiopike, somaleze dhe sudaneze, që dhunohen, torturohen
e përndiqen nga banda kusarësh në Egjipt e në vendet kufi. Këtu kemi edhe lidhje ndërmjet
trafikantëve dhe krimit të organizuar, që administron “tregun e zi” të organeve njerëzore.
Gjendja është e keqe edhe në Bregun e Fildishtë e në Sudan, të cilat i detyrojnë njerëzit
të ikin, ndërsa vendet e pasura bëjnë një lloj lufte të ftohtë ekonomike për të marrë
sa më shumë nga pasuritë e Afrikës. Ndërkaq, vazhdon kalvari i refugjatëve irakianë,
të emigruar në Evropën Veriore, nga ku autoritetet kthejnë mbrapsht me forcë edhe
ata që kërkojnë azil politik. Kështu po ndodh në Britaninë e Madhe, në Francë, në
Hollandë, në Norvegji e në Suedi, pavarësisht se kjo praktikë është dënuar nga Bashkimi
Evropian. Nga viti 2008 e deri më sot, rreth 5 mijë irakianë janë kthyer vullnetarisht
në atdhe, por mëse 800 janë dërguar mbrapsht në kundërshtim me dëshirën e tyre. Pastaj,
në kronikat e fundit, lexojmë për tragjedinë e mijëra të zhvendosurve për shkak të
fatkeqësive, shkaktuar ose nga natyra, ose nga administrimi i keq i territorit nga
ana e njeriut. Vërtet, kemi tashmë shumë viktima, pas përmbytjes në qytetin e Brisbejnit,
për shembull. Qyteti i tretë më i madh i Australisë u shndërrua në një “zonë vdekjeje”,
por drama e përmbytjeve luhet edhe në verilindje të Australisë. Në Brazil, shumë persona
kanë mbetur pa shtëpi pas shiut të rrëmbyer, që shkaktoi shumë rrëshqitje dheu në
qytetet në majë të maleve, që rrethojnë Rio De Zhaneiron. Përmbytjet kanë goditur
edhe Sri Lankën, ku burime qeveritare informojnë për 351 kampe për të zhvendosurit,
numri i të cilëve i afrohet 130 mijëshit, ndërsa numri i të gjithë njerëzve, që kanë
pësuar dëme nga përmbytjet, arrin në 860 mijë. Pa harruar, së fundi, se në Indonezi,
të paktën 11 mijë vetë janë akoma nëpër kampe, pas përmbytjeve të shkaktuara nga shiu
i përzier me rërë e gurë vullkanikë, që prishi rrugët e dëmtoi shumë fshatra. Përpjekjet
e Kishës për të ndihmuar këto popullsi janë të shumëfishta: vijnë ndihma ekonomike
nga shumë vende e madje edhe Papa, përmes Këshillit Papnor Cor Unum, ofron solidaritetin
e tij. Por, këtu, dua të kujtoj thirrjen për respektimin e të drejtave të emigrantëve,
që bëri pak ditë më parë, kryeipeshkvi i Lèon dhe kryetari i Konferencës Ipeshkvnore
të Meksikës, imzot Hosè Guadalupe Martin Ràbago. Ipeshkvi denoncoi dhunën dhe përndjekjet
kundër emigrantëve, që përpiqen të shkojnë në SHBA-të, përveç kritikws për abuzimet
e autoriteteve e të forcave të sigurisë, për sekuestrimin e emigrantëve të parregullt
dhe për rritjen e pushtetit të kriminalitetit të organizuar. Në Kahuites, gjatë muajit
dhjetor, u rrëmbyen 50 emigrantë, për të cilët nuk dihet akoma asgjë, ashtu si për
emigrantët afrikanë të gadishullit Sinai.