Benedikti XVI miraton Dekretin: Gjon Pali II do të lumnohet më 1 maj 2011.
(14.01.2011 RV)Gjon Pali II do të shpallet i Lum më 1 maj 2011. Kremtimi do
të mbahet në Vatikan e do të kryesohet nga Benedikti XVI. Data u zyrtarizua sot paradite,
kur Papa nënshkroi Dekretin e Lumnimit, në të cilin figurojnë edhe emrat e kandidatëve
të tjerë, që do të lartohen në nderimet e elterit. Ndërmjet tyre, profesor Gjuzepe
Toniolo, themelues i “Javës shoqërore të katolikëve italianë” si dhe pesë rregulltare
boshnjake, të mbytura nga urrejtja për fenë katolike. Sigurisht ky lajm, i cili
tashmë ka marrë dhenë, e vë edhe një herë në qendër të vëmendjes Papën Vojtila, që
ndërroi jetë më 2 prill 2005 e arriti në cakun e lumnimit pas njohjes së një mrekullie,
bërë me ndërmjetësimin e tij, pak ditë pas vdekjes. Është fjala për shërimin e një
murgeshe franceze nga sëmundja e parkinsonit. Kardinali Angelo Amato, prefekt
i Kongregatës për Çështjet e Shenjtorëve flet, në mikrofonin tonë, pikërisht për mrekullinë
si dhe për mënyrën e zhvillimit të çështjes së lumnimit:
Përgjigje: -
E them menjëherë se çështja pati dy lehtësi. E para ka të bëjë me miratimin
papnor për të mos pritur pesë vjet; e dyta, me përjashtimin e rastit nga lista e pritjes.
Por, pavarësisht nga këto, të gjitha procedurat u kryen me seriozitet e kujdes të
jashtëzakonshëm, pa asnjë lëshim. Çështja u trajtua njëlloj si të tjerat, duke ecur
hap pas hapi, sipas ligjshmërisë së Kongregatës për Çështjet e Shenjtorëve. Madje,
duhet të shtoj se pikërisht për ta nderuar më shumë kujtimin e këtij Pape të madh,
Çështja u shqyrtua edhe më imtësisht, për të shmangur çdo dyshim e për të kapërcyer
çdo vështirësi, që mund të delte më pas. Pyetje: - Ç’mund
të na thoni për mrekullinë?
Përgjigje: - Bëhet
fjalë për shërimin e rregulltares franceze, Mari Simon Pierre, nga sëmundja e parkinsonit.
Sëmundja e saj u diagnostikua në vitin 2001 nga mjeku kurues e edhe nga specialistë
të tjerë. Motra nisi mjekimet, të cilat jo vetëm nuk e shëruan, por ia shtuan dhimbjet.
Kur mori lajmin e vdekjes së Papës Vojtila, që vuante nga e njëjta sëmundje, Motër
Maria e simotrat nisën t’i kërkonin Papës së vdekur ndërmjetësim për shërimin e saj.
Më 2 qershor 2005, e lodhur dhe e këputur nga dhimbjet, rregulltarja i kërkoi Eprores
së përgjithshme të largohej nga puna. Po eprorja e ftoi të mos e humbiste besimin
në ndërmjetësimin e Gjon Palit II. Pas kësaj bisede, motra kaloi një natë çuditërisht
të qetë. Kur u zgjua, ndjeu se ishte shëruar. Dhimbjet ishin zhdukur, e bashkë me
to, edhe dridhjet e mpirja e artikulacioneve. Ishte data 3 qershor 2001, festa e Zemrës
së Krishtit. Murgesha i ndërpreu menjëherë ilaçet e u nis tek mjeku, që e kuronte.
Ai, i mrekulluar, pa se e sëmura ishte shëruar plotësisht.
Në listën e
të lumëve të ardhshëm, për të cilët Benedikti XVI nënshkroi sotDekretet, spikat
figura, sipas kardinalit Amato, me vlerë të madhe kulturore, e Gjuzepe Toniolos, laik
e babë familjeje, profesor i Ekonomisë politike në Universitetin e Pizës, i cili jetoi
ndërmjet viteve 1845 e 1918, duke lënë pas kujtimin e njeriut, që luajti rol të dorës
së parë në veprimtarinë e katolicizmit shoqëror të Italisë. Thellësisht prekëse,
pastaj, vijoi prefekti i Kongregatës për Çështjet e Shenjtorëve, vrasja brutale e
pesë motrave të Institutit të Bijave të Dashurisë Hyjnore, që pësuan martirizimin
thjesht për urrejtje kundër fesë së krishterë, falë së cilës ia kishin kushtuar gjithë
jetën fëmijëve e të varfërve. Në nderimet e elterit do të lartohet edhe Nënë Antonia
Maria Verna, themeluese e Institutit të Zojës së Papërlyer të Ivresë, që jetoi ndërmjet
viteve tetëqind e nëntëqind. Vijnë, pastaj, edhe gjashtë të Lumë të tjerë, nga
vende të ndryshme të botës, me moshë e veprimtari të ndryshme, në Kishë e në shoqëri.
Janë të gjitha figura mahnitëse – përfundoi kardinali Amato – me famë shenjtërie
në vendet ku lindën, punuan e vdiqën e shembuj tejet aktualë për dëshminë ungjillore.