(13.01.2011 RV)Të dashur dëgjues, nesër, më 14 janar, Kisha Katolike kujton
rrethprerjen e Jezu Krishtit. Sot, do të shpjegojmë se cili është kuptimi i “rrethprerjes”
për të krishterët, pavarësisht nga buzëqeshjet e nga pëshpëritjet, që mund të shkaktojë
ky argument, në dukje i vështirë.
Gjesti i prerjes kirurgjikale të prepucit
nga organi seksual mashkullor është një akt, që praktikohej nga shumë popullsi të
lashta dhe ka ardhur deri më sot. Për shembull, në Shqipëri e kryejnë edhe sot e kësaj
dite myslimanët. Në shumicën e rasteve, ky akt ka vlerë simbolike, kulturore e fetare.
Tradita biblike, pavarësisht se njeh forma të tjera të rrethprerjes (për shembull,
Ismailit ia bënë rrethprerjen 13 vjeç, mbi bazën e zakonit protoarab, ndërsa birit
të Moisiut, mbi bazën e një riti të mistershëm, të kryesuar nga e ëma, përshkruar
në Librin e Daljes 4,24-26), pra, tradita biblike i cakton këtij akti ditën e tetë
pas lindjes, siç i pati thënë Zoti Abrahamit (Zan 17,12). Vërtet, kështu bën patriarku
me të birin e vet, Isakun (Zan 21,4) e kështu bëhet edhe me Jezusin (Lk 2,21). Ky
lloj “operacioni” merr një domethënie të rëndësishme teologjike, që e bën gati “sakrament”
për fenë hebraike: “Do ta rrethprisni lëkurën e gjymtyrës suaj, që të jetë shenjë
besëlidhjeje ndërmjet meje dhe juve” (Zan 17,11). Në këtë dritë, është e qartë
se rrethprerja është shenjë emblematike e përkatësisë në popullin hebraik që në fillim
të jetës së tij dhe përbën element diskriminues për popujt e tjerë, që quhen me përbuzje
“të parrethprerët”. Prandaj, është i ashpër dënimi për ata hebrenj, që në kohën helenistike,
për të ndjekur modën pagane e për t’u bërë njëlloj me kombet e tjera, bënin madje
një operacion plastik për t’i çuar gjërat ashtu siç ishin para rrethprerjes (1 Mak
1,15). Por profetët, që u ndoqën edhe nga tradita e mëvonshme biblike, nuk hezituan
të sqarojnë se riti në vetvete nuk ishte aq i rëndësishëm sa pranimi i ligjit, i besëlidhjes,
i fesë. Për këtë arsye, Jeremia fton të “rrethpritet zemra” (4,4). Edhe në
Librin e Ligjit të Përtërirë thuhet: “Rrethpritni zemrën tuaj” (10,16), ndërsa
te Levitiku dënohet “zemra e parrethprerë” (26,41). Në këtë rrugë, do të ecë
edhe krishterimi, i cili i jep pak rëndësi aktit të rrethprerjes në vetvete dhe vlerës
së tij të jashtme. Por, në këtë pikë arrihet përmes një debati aq të ashpër, sa u
desh “koncili” i Jeruzalemit, përshkruar në kapitullin 15 të Veprave të Apostujve. Vërtet,
të krishterët me origjinë hebraike ishin plotësisht të vendosur t’u impononin besimtarëve,
që vinin nga paganizmi, rrethprerjen para pagëzimit: “Po nuk u rrethpretë sipas
dokes së Moisiut, nuk mund të shëlboheni” (15,1). Ndërsa shën Pali, edhe më vonë,
luftoi për ta konsideruar këtë akt të panevojshëm për pranimin në Kishë e për shëlbimin
e shpirtit. Madje, me një lloj brutaliteti, arrin ta quajë rrethprerjen – në greqisht,
“peritomè” – si një lloj “gjymtimi” – në greqisht, “katakomè”(Fil 3,2).
Pikërisht ai vetë do të deklarojë, në Letrën e parë drejtuar Korintianëve: “Nuk
është asgjë rrethprerja dhe nuk është asgjë parrethprerja – vlen vetëm zbatimi i urdhërimeve
të Hyjit” (1 Kor 7,19). Më këtë qëndrim, shën Pali ndiqte traditën e profetëve
dhe vinte në dukje frymën e vërtetë të ritit, i cili deri atëherë, ishte thjesht shenja
e jashtme e diçkaje më të madhe: e përkatësisë jetësore në besëlidhjen me Zotin dhe
në impenjimet morale, që rrjedhin prej kësaj. “Judeu i vërtetë nuk është ai që
shitet përjashta si i tillë, si edhe rrethprerja e vërtetë nuk është ajo, shenja e
pashme në mish, por judeu i vërtetë është në brendinë, edhe rrethprerja e vërtetë
është në zemër, simbas shpirtit e jo simbas germës së Ligjit”, shkruhet në Letrën
drejtuar Romakëve.