Հայրենի անուանի դերասան Կիմ Երիցեան իր մահկանացուն կնքեց 80 տարեկանին։ Այս առթիւ
Հ Հ նախագահ Սերժ Սարգսեան ցաւակցական հեռագիր յղած է Հայաստանի ժողովրդական դերասան
Կիմ Երիցեանի ընտանիքին ։ Ողբացեալ դերասանը՝ Կիմ Երիցեան ծնած է 1930-ին, Թիֆլիս։
1951-էն սկսեալ ապրած է Երեւանի մէջ։ 1957-ին գերազանց վկայականով աւարտած է Երեւանի
գեղարուեստա-թատերական հիմնարկի դերասանական բաժանմունքը։ 1955-1973 իբրեւ դերասան աշխատած
է Յ. Պարոնեանի անուան երաժշտական երգիծական թատրոնին մէջ։ 1973-2006 աշխատած է Հ Ղափլանեանի
անուան տրամաթիքական թատրոնին մէջ, ուր բացայայտուած է Կ Երիցեանի ինքնատիպ տաղանդը։
Անոր խաղաոճին մէջ կը բնորոշուի ողբերգականի եւ կատակերգականի միասնութիւնը։ Երիցեան
տպաւորիչ գունեղութեամբ կերտած է բազմաթիւ հայ եւ համաշխարհային կերպարներ։ Հայազգի դերասանը
իր ստեղծագործական կեանքի ընթացքին մարմնաւորած է աւելի քան հարիւր դեր։ Հայ թատրոնին
մատուցած ակնառու ծառայութիւններուն համար 2009-ին Կիմ Երիցեանին շնորհուած է Հայաստանի
Ժողովրդական արուեսատագէտի բարձր կոչում։ Իսկ վերջերս մեծ շուքով նշուած էր սիրուած դերասանին
80-ամեակը,որուն ընթացքին պարգեւատրուած էր Հայաստանի Մշակոյթի Ոսկիէ Մետալով։