Sagrada Familia, stema e dikasterit të Vatikanit për Ungjillëzimin e Ri
Tempulli i Sagrada Families në Barcelonë, projektuar nga arkitekti i famshëm Antonio
Gaudi e vizituar nga Benedikti XVI më 7 nëntorin e kaluar, do të bëhet stema e dikasterit
të ri të Vatikanit për Ungjillëzimin e Ri. Lajmi jepet në gazetën “L’Osservatore Romano”
nga presidenti i Këshillit Papnor, të themeluar në tetorin e vitit 2010 nga Papa,
imzot Rino Fizikela. Në të përditshmen e Vatikanit, imzot Fizikela sqaron edhe arsyet
e këtij vendimi. Sagrada Familja, shpjegon ai, “ngrihet në zemrën e qytetit të
shekullarizuar e përfaqëson një mesazh shumë konkret: është ftesë për të përdorur
një gjuhë të re, për të mbushur hapësirën e jashtëzakonshme që do të linte Kisha në
mes të qytetit, sikur të mos ekzistonte”. Ky tempull i Barcelonës është një katedrale
moderne, por ka edhe karakteristikat thelbësore, të cilat gjejnë vend në artin kishtar
që prej 2000 vjetësh. Etapa e parë e punës së dikasterit është njohja
me ç’po bëhet në botë për ungjillëzimin e ri, sidomos në dioqezat e Amerikës Veriore.
Detyra jonë, sqaron ish-rektori i Universitetit Lateranens, është impenjimi kapilar,
që shkon nga famullitë tek realitetet e ndryshme brenda Kishës, për të dëshmuar fenë
e krishterë.