(06.01.2011 RV)Po sot, Kisha Katolike kremton Ditën Misionare të Fëmijëve e
të Rinjve, e cila i fton ata të intensifikojnë shpalljen e Lajmit të Mirë dhe solidaritetin
me vëllezërit e afërt e të largët. Motoja e vitit 2011 është “Hyr! Ka vend për të
gjithë” dhe vë në dukje dy aspekte të misionit: atë të thirrjes personale që Zoti
i bën çdo të pagëzuari dhe ndarjen me vëllezërit të dhuratës së marrë, të Bukës së
Jetës thyer për të gjithë njerëzit. Themeluar nga Papa Piu XII në vitin 1950,
Dita Misionare e Fëmijëve përbën një çast të rëndësishëm formimi për misionin që të
rinjtë kanë në përhapjen e Ungjillit. Është gjithashtu rasti për t’u thelluar në kuptimin
e festës së Dëftimit të Zotit, në të cilën Krishti Fëmijë njihet nga Mbretërit Dijetarë
si Shëlbues i njerëzimit. Të gjitha ofertat e besimtarëve në meshën e sotme do të
shkojnë për programe në misionet katolike nëpër botë. Për Oqeaninë, ato do të
mbështesin programe formimi të krishterë në dioqezën Taraua-Nauru në Ishujt Kiribati.
Në Evropë, projekti që kanë zgjedhur të rinjtë është për Ukrainën. Do të mbështeten
me formim shkollor e shpirtëror vajzat e vogla me probleme familjare dhe do të ndihmohen
me ushqime e me asistencë shëndetësore. Amerika përfaqësohet nga Peruja, ku të rinjtë
misionarë do të bashkëpunojnë në ndihmën për fëmijët me të meta fizike në Vikariatin
Apostolik të San Hozesë në Amazonë. Në Azi, ofertat do të mbërrijnë në dioqezën indiane
të Shimogës për rehabilitimin e fëmijëve punëtorë. Së fundi, falë fëmijëve misionarë,
dioqeza afrikane e Katiolës në Bregun e Fildishtë do të pajiset me një qendër ekonomie
shtëpiake për të rejat pa shkollë, me kurse alfabetizimi e rrobaqepësie.