Kongresi i SHBA-ve: republikanët i shpallin luftë reformës së shëndetësisë

(05.01.2011 RV)Shfuqizimi i reformave të deritanishme nga administrata e Barak Obamës, duke filluar nga ajo e shëndetësisë: ky është objektivi i republikanëve, të cilët kanë fituar kohët e fundit shumicën në zgjedhjet e gjysmës së legjislaturës për Kongresin amerikan. Pikërisht sot, filloi punimet asambleja e re. Si mund të interpretohet qëndrimi i republikanëve? Pyetëm pedagogun e historisë amerikane në Universitetin italian të Barit, Niko Perrone:
Sipas meje, nuk është mesazh simbolik, pasi republikanët e duan këtë luftë. Që kjo pastaj, të jetë rrezik i vërtetë për ligjin mbi shëndetësinë, unë do të thosha se jo: duhet pasur parasysh se republikanët nuk e kanë shumicën në të dyja degët e Parlamentit amerikan. Reforma shëndetësore nuk u pëlqen republikanëve, nuk i pëlqen një pjese të konsiderueshme të Amerikës, nuk i pëlqen madje edhe një pjese të demokratëve, por tashmë, reforma ekziston e shfuqizimi i saj do të ishte një traumë tepër e madhe për Amerikën. Natyrisht, reforma duhet rishikuar. Republikanët do të ngulin këmbë në koston e përgjithshme, që ka për vendin, regjimi i ri shëndetësor.
Cilat do të jenë pasojat mbi mandatin e Obamës, i cili gjithsesi, është në gjysmën e legjislaturës?
Do të jetë e nevojshme që Obama të bëjë më tepër politikë se deri tani. Pushteti i presidentit amerikan është konsideruar gjithnjë në botë – e ka qenë kështu edhe me fakte – si një lloj pushteti absolut, në marrëdhënie shumë të pakta me dhomat e parlamentit, pasi zakonisht kishte shumicën në të dyja. Mund të ndodhte ndonjë incident i vogël, por në përgjithësi, kishte shumicën e votave. Ndërkaq, Obamës i mungon pikërisht shumica, të cilën ai duhet ta fitojë me politikën e vet. Sipas meje, kjo është pozitive, pasi do ta detyrojë Obamën të mos e ushtrojë pushtetin, pa dhënë llogari. Por, presidenti aktual amerikan di ta luajë politikën, prandaj mendoj se do ta kapërcejë këtë provë të vështirë.