Benedikti XVI protagonist i ekonomisë për vitin 2010
(04.01.2011 RV)“Për thirrjet e tij të vazhdueshme drejtuar bashkësisë ekonomike
dhe financiare, kundër egoizmit dhe shfrytëzimit pa kriter të burimeve” dhe “për kontributin
në transparencën e IOR-it (Institutit të Veprave Fetare, që njihet si Banka e Vatikanit)”:
me këtë motivacion, gazeta ekonomike italiane “Il Sole 24 ore” e ka vendosur Papën
Benedikti XVI në mesin e protagonistëve të botës ekonomike për vitin 2010. “Papa
teolog – shkruan gazeta – ka dhënë edhe një herë provë për thellësinë e mendimit të
tij e për sa është i aftë të ndikojë në shoqërinë bashkëkohore”. Në epokën e krizës
aktuale, mesazhi i enciklikës “Caritas in veritate” qe thelbësor kundër egoizmit dhe
nihilizmit të botës. Gjithashtu, gazeta tërheq vëmendjen mbi thirrjet e Atit të Shenjtë
për të shfrytëzuar mirë burimet globale, sidomos ato bujqësore, për të ndihmuar kështu
edhe vendet e varfëra. Vihet në dukje veçanërisht impenjimi i Papës për transparencën
bankare, kundër pastrimit të parave dhe financimit të terrorizmit.