Krishtlindja në Shqipëri: mijëra besimtarë kremtojnë festën
25.12.2010TIRANE -Mijëra besimtarë në vendin tonë festojnë sot Krishlindjen,
festën më të madhe dhe më të rëndesishme të krishterimit. Meshat kane filluar që dje
në mesnatë në mjaft qytete të vendit ku besimtaret katolikë i janë bashkuar festës
së madhe, kremtimit të lindjes së Krishtit, ndërsa në të gdhirë të mëngjesit të sotëm,
shqiptarët e besimit ortodoks ndoqën meshën dhe ndezën qirinj në Kishën Autoqefale.
Me qirinj ndër duar, duke u lutur për paqe dhe gëzim, qetësi dhe dashuri,
besimtarët e krishterë kanë kryer ritet fetare rreth mesnatës në një atmosferë festive. Ceremonia
kryesore është zhvilluar ne Katedralen e Shën Palit në Tiranë, ku kanë qënë të pranishëm
krahas qytetarëve të shumtë dhe politikanë. Imzot Rrok Mirdita drejtoi meshën
duke u uruar besimtarëve shume dashuri dhe paqe. Mesha nisi me këndimin e liturgjive,
pjesë nga Bibla. Imzot Rrok Mirdita u bëri thirrje besimtareve të udhëhiqen nga mirësia
dhe drejtësia. Imzot Rrok Mirdita theksoi se “në Botë mungon paqja, por udha e
paqes është udha e dashurisë. Në marrdhëniet me të tjetërt gjejmë veten”, u tha Imzot
Rrok Mirdita, besimtarëve. Dita e Krishtlindjeve, tha kreu i Konferencës Ipeshkvnore,
Rrok Mirdita, "na kujton të gjithëve se sa të nevojshme janë falja, pajtimi dhe mëshira”.
Me qirinj ndër, duar duke u lutur për paqe dhe gëzim, qetësi dhe dashuri, besimtarët
e krishterë kanë kryer ritet fetare rreth mesnatës në një atmosferë festive. Ndërsa
në orët e para të mëngjesit të sotëm, Kryepeshkopi i Tiranës, Durrësit dhe i gjithë
Shqipërisë, Hirësia e Tij Anastas Janullatos, në meshën e mbajtur iu drejtua besimtarëve
me urimin për të qenë më të dashur me njëri-tjetrin si dhe të respektojmë çdo formë
njerëzore. Përgjatë ditës së sotme, pritet gjithashtu që të ketë të tjera ceremoni
festive, ndërsa krerët e shtetit shqiptar të zhvillojnë vizita ne katedralen e Shën
Palit dhe në Kishën Ortodokse në Tiranë, për të përcjelle urimet e tyre për besimtaret
katolikë dhe ata ortodoksë. 25 dhjetori, dita e shënuar e lindjes së Jezu Krishtit,
që kremtohet në gjithë botën si dita e shpresës, paqes dhe dashurisë njerëzore, edhe
në Shqipëri, mbas viteve ’90 kur u lejua besimi fetar, krijoi traditën e saj duke
u shënuar krahas festave të tjera tradicionale në kalendarin e vitit.
FESTA
NE KORCE, ELBASAN, GJIROKASTER E VLORE KORÇE- Besimtarët e krishterë në Korçë u
mblodhën në katedralen "Ringjallja e Krishtit", ku u kryen shërbesat e rastit. Mitropoliti
i Korçës, hirësia e tij, Johani, gjatë meshës së krishtlindjeve theksoi se "krishtlindja
na sjell gjithmonë lajmin e gëzuar qiellor se lindi shpëtimtari i krijimit dhe i gjithësisë
dhe na bën thirrje që të meditojmë rreth këtij lajmi”. Pas meshës, hirësia e tij,
Johani priti vizita në Mitropolinë e Korçës. Festa e Krishtlindjeve po festohet dhe
nëpër lokale dhe pikat turistike të Voskopojës dhe Dardhës. ELBASAN-. Pas orës
00:00, besimtarët katolikë mbushën kishën Shën Piu i X - të, ku famulltari Emilio
Valente drejtoi meshën. Edhe në kishën Ortodokse "Shën Maria", brenda kalasë së qytetit
të Elbasanit, famulltari At Nikolla Marku, mbajti meshën e rastit duke përcjellë mesazhe
për mirësi, dashuri dhe tolerancë". Urime në këtë ditë përcollën dhe përfaqësues të
pushtetit lokal. GJIROKASTËR- Krishtlindja mbodhi në Kishën e Shën Mëhillit në
lagjen Varosh, si dhe në Kishën Shën Sotiri, në lagjen “Pazari i Vjetër”, mijëra besimtarë
ortodoksë që mbanin në duart lule dhe qirinjë, simbol i paqes dhe dashurisë për Jezu
Krishtin. At Theodhori Nikolla, udhëheqësi i meshës në Kishën e Shën Mëhillit, lexoi
mesazhin e urimit të Kryepeshkopit të Kishës Ortodokse-Autoqefale, Hirësia e Tij,
Anastasios Janullatos. Edhe në kishat e rrethit të Përmetit, Tepelenës, Sarandës,
Delvinës, besimtarët ortodoksë dhe katolikë festuan lindjen e Krishtit. VLORË-
Qindra besimtarë të krishterë, por edhe të besimeve të tjera, morën pjesë në meshat
e organizuara gjatë natës dhe në orët e para të mëngjesit, në Kishën Katolike të këtij
qyteti dhe në Kishën Ortodokse të Shën Theodhorit. Natën e Krishtlindjeve në Kishën
Ortodokse të Shën Theodhorit u zhvillua Mbrëmësorja e Madhe e Krishtlindjeve dhe Mesha
Hyjnore me praninë e dhjetra besimtarëve, që u drejtua nga At Konstandin Prifti.
Në
orët e mëngjesit dhe paradites u zhvillua Shërbesa e Mëngjesores dhe Mesha Hyjnore,
që u drejtuan nga Mitropoliti i Shenjtë i Beratit, Vlorës, Kaninës dhe gjithë Myzeqesë,
Ignat Triandis. Duke folur përpara besimtarëve ai tha se në këtë ditë solidariteti
mes njerëzve është më i dukshëm dhe jeta merr dimensione të tjera. Atmosfera më Kishën
Katolike dhe atë Ortodokse të Shën Theodhorit, ishte po aq festive edhe gjatë orëve
të paradites. KRISHTLINDJE QUHET LINDJA NE MISH E ZOTIT Betlehemi është
qyteti i lindjes së Krishtit para dy mijë vjetësh, i cili erdhi në jetë në një kasolle.
Në shërbesat që i paraprijnë Krishtlindjes lexohen pjesët e Dhiatës së Vjetër
rreth Lindjes së Krishtit, duke theksuar profecinë e Mikeas, e cila e parathotë Bethlehemin
si vendlindjen e Shpëtimtarit dhe profecitë e Isaisë rreth ardhjes dhe karakterit
të Mesias: Vetë Zoti do t’ju japë një shenjë: Ja, një virgjëreshë do të mbetet me
barrë dhe do të lindë një fëmijë, të cilin do ta quajnë Emanuel, që do të thotë Perëndia
është me ne (Isaia 7:14-15). Sepse na ka lindur një fëmijë, një djalë na është dhënë.
Mbi supet e tij do të jetë mbretërimi dhe do të quhet i Mrekullueshëm, Këshilltar,
At i Përjetshëm, Princ i Paqes. Nuk do të ketë të sosur rritja e mbretërimit dhe paqes
së tij (Isaia 9:6-7). Festa e Krishtlindjes quhet dhe Lindja në Mish e Zotit dhe
Perëndisë dhe Shpëtimtarit tonë Jisu Krisht. Në Krishtlindje kremtohet lindja si njeri
e Birit të Perëndisë, të atij që së bashku me Atin dhe Shpirtin e Shenjtë është me
të vërtetë Perëndi në jetë të jetëve. Prandaj në Kishë këndohet: Virgjëresha lindi
sot të përmbiqenshmen Fjalë, edhe dheu i blaton të paafruarit shpellën; Engjëjtë,
me barinjtë po lavdërojnë, Magët pra, bashkë me yllin po udhëtojnë; se për ne ka lindur
Krishti, si djalë foshnjë, i parëjetëshmi Zot. Festa e Krishtlindjes është kremtimi
i shpëtimit të botës nëpërmjet Birit të Perëndisë, i cili u bë njeri për ne, që me
anën e tij, ne të mund të bëhemi hyjnorë, bij të Perëndisë Atë, me anë të banimin
ndër ne të Shpirtit të Shenjtë.
SI LINDI FESTA E TE KRISHTEREVE Krishtlindja
(edhe "Kërshëndellat" apo shkurt "Kshnellat" ndër besimtarët katolikë) është një festë
fetare e krishterë. Të krishterët e festojnë çdo vit më 25 dhjetor ditëlindjen e Jezus
Krishtit; në kishat e Lindjes festohet më 7 janar, për shkak të kalendarit Julian.
Pas Pashkëve është festa më e rëndësishme për të krishterët. Ditëlindja e Krishtit
(24-25 dhjetori) është thjeshtë simbolike, dhe nuk është menduar të jetë data e vërtetë
e lindjes se Tij. Rëndësia e ditës së Krishtlindjes nisi të rritet dalngadalë
pas kurorëzimit të Karlit të Madh në vitin 800, ditën e Krishtlindjes. Sot dita
e Krishtlindjes kremtohet me shfaqjen e skenës së lindjes së Krishtit, pemën e Krishtlindjes,
shkëmbimin e dhuratave dhe Kartolinave, familjen e bashkuar, dhe ardhjen e Shën Nikollës
apo Plakut të Vitit të Ri në prag të Krishtlindjes apo mëngjesin e Krishtlindjes.
Krishtlindja është festa në të cilën të krishterët dëshirojnë më shumë se kurrë paqe
e dashuri në botë. Festes i bashkohet dhe agjencia e lajmeve ne internet, BalkanWeb.
Uron gjithe besimtarët e krishterë, Gëzuar Krishtlindjet! (d.b/BalkanWeb)