Irak: Kisha i fton besimtarët t’u përgjigjen me fe kërcënimeve të Al Kaedës.
(25.12.2010 RV)Të krishterët në Irak e kremtuan festën e madhe të Krishtlindjes
në atmoferën e kërcënimeve, publikuar nga Al Kaeda. E pritën lindjen e Krishtit në
shpirt, pa meshë mesnate, pa festime të tjera, në atmosferë zije, duke kujtuar të
vdekurit e shumtë të kërdisë terroriste në Katedralen siro-katolike të Bagdadit. Al
Kaeda kërkon kthimin në fenë islame të të gjithë të krishterëve. Por, pavarësisht
nga kërcënimet, asnjë nuk e braktisi fenë, sepse kjo është forca e besimtarëve. Mëkëmbësi
ipeshkvnor kalde i Bagdadit, imzot Shlemon Varduni, komenton: “Ky është realiteti
i trishtuar, në të cilin jetojnë bashkësitë tona të krishtera. E festuam Krishtlindjen
- pohon Prelati - pa meshë mesnate, duke e kremtuar heret, në agim, Meshën e së kremtes
së madhe. Terroristëve, që na kërcënojnë, u përgjigjemi me fe e paqe, si na mëson
Papa në mesazhin e tij të fundit për paqen. Duke u kujtuar se edhe Kurani i ka për
zemër vlerat e lirisë, të tolerancës e të respektit. Në se vëmë në jetë atë që
bashkon, paqja nuk do të mbetet vetëm mirazh, por do të bëhet realitet! Prandaj mesazhi
ynë i Krishtlindjes për 500 mijë besimtarët tanë, nga 800 mijë që ishin në vitin 2003,
vijon të jetë: “Mos kini frikë!”.