Лацінскі Патрыярх Іерусаліма аб важнейшых падзеях 2010 г. для Святой Зямлі
Удзячнасць Бэнэдыкту
XVI за Сінод Біскупаў для Блізкага Усходу, задавальненне з прычыны рэкорднага наплыву
пілігрымаў у Святую Зямлю, а таксама занепакоенасць з прычыны пажару ў ваколіцах Хайфы
і няўдачы ў перамовах паміж Ізраілем і Палесцінскай аўтаноміяй аб міры — галоўныя
тэмы паслання арцыбіскупа Фуада Туаля на Божае Нараджэнне. Лацінскі Патрыярх Іерусаліма
нагадвае ў пасланні аб важнейшых падзеях 2010 г. Кажучы аб пасяджэнні Сіноду Біскупаў
для Блізкага Усходу, арцыбіскуп Туаль заўважае, што яно стала нагодай, каб «укласці
палец у нашы раны, а адначасова выказаць чаканні і надзеі». Патрыярх заахвочвае вернікаў
Святой Зямлі быць добрымі хрысціянамі і грамадзянамі. «Вера павінна матываваць да
большага ўдзелу ў будаванні нашых грамадстваў, як у арабскіх краінах, так і на тэрыторыі
дзяржавы Ізраіль», — піша іерарх, нагадваючы, што айцы Сіноду асудзілі ўсялякае насілле,
рэлігійны фундаменталізм, антысемітызм, антыхрысціянізм і ісламафобію. Пішучы
аб рэкорднай колькасці пілігрымаў у Святой Зямлі (іх лічба да канца года можа скласці
3,4 мільёны), Патрыярх адзначае, што гэты факт пацвярджае паўсюднае значэнне Іерусаліма,
Бэтлеема і Назарэта, гасціннасць мясцовых жыхароў і прысутных там Цэркваў, а таксама
добрую працу міністэрстваў турызму Ізраіля і Палесціны.
Лацінскі Патрыярх
Іерусаліма выказвае задавальненне з прычыны прызнання віз святароў, семінарыстаў і
валанцёраў, адначасова молячыся аб поспеху ў размовах Апостальскай Сталіцы з Арганізацыяй
вызвалення Палесціны.
Арцыбіскуп Туаль згадвае і аб вялікім пажары ў ваколіцах
Хайфы. Гэтае здарэнне, як адзначаецца, дапамагло выявіцца міжнароднай салідарнасці,
у тым ліку з боку палесцінскіх уладаў. Па словах іерарха, гэта можна назваць пачаткам
плённага супрацоўніцтва, якое працягнецца ў мірных умовах.