Mësimet e Papës mbi Krishtlindjen: prej dymijë vjetësh, risia e takimit me Zotin Foshnje,
që na fton të gëzojmë e të galdojmë
Duhet hapur zemra, duhet gjetur në një kënd të saj, gatishmëria për të jetuar thelbin
e Krishtlindjes, takimin me Atë, që vjen të banojë mes nesh, takimin me Jezu Krishtin,
Birin e Zotit bërë njeri. Me këto fjalë, Papa shpjegoi dje në audiencën e përgjithshme,
se si duhen përgatitur të krishterët për Krishtlindje. Ajo e takimit me Fëmijën Hyjnore
është një temë, që Benedikti XVI e ka prekur shpesh.
Çdo Krishtlindje, e njëjta
histori, por jo ajo që filloi 2000 vjet më parë në Betlehem. Është historia e biskotave,
dhuratave, pushimeve e lloj-lloj xhinglave, që trumbetohen në tregjet e gjithë botës,
duke e kthyer atë në një lloj parajse të rreme, ku gjithçka duket sikur shkon mirë
e gjithshka është e shndritshme. Gjithnjë njëlloj! Krishtlindja e 2000 vjetëve
më parë s’kishte asgjë të tillë, përveçse yllit kometë lart në qiell. E vërtet, pak
vetë e kuptuan se gjendeshin në prag të një bote të re, ku qielli e toka, sapo ishin
prekur ndërmjet tyre, në atë natë, që dje, Benedikti XVI e quajti “nata e botës”. U
takuan një fëmijë i sapolindur dhe një grup barinjsh, Zoti njohu ata për të cilët
kishte ardhur e njerëzit e adhuruan, pa e ditur se do t’i shpëtonte nga mëkati i kësaj
bote. Për Krishtlindje pra, nuk kemi alternativë tjetër: duhet të shkojmë në atë takim,
duke lënë mënjanë zhurmën dhe stresin e festës për një Lindje, që nuk është imazhi
i ndonjë marke, por një mister, i cili pa reklamë, rrezikon të kalojë në heshtje: “Zoti
na tregon “foshnjen” e përvujtë për të fituar mbi kryelartësinë tonë. Ndoshta do të
tërhiqeshim më lehtë para pushtetit, ose para urtisë; por Ai nuk do që të tërhiqemi;
i bën thirrje zemrës dhe vendimit tonë të lirë për ta pranuar dashurinë e Tij. U bë
i vogël për të na çliruar nga pretendimi njerëzor i madhështisë, që vjen nga mendjemadhësia;
u mishërua lirisht për të na bërë ne vërtet të lirë, të lirë ta duam” (Audienca e
përgjithshme, 17 dhjetor 2008) Megjithatë, dikush e refuzon lirinë për ta
dashur atë Fëmijë. Për shkak të përbuzjes së llogaritur, ose të indiferencës, ose
të ndonjë ndjenje tjetër! E prapë se prapë, njerëzit tërhiqen nga ai takim, që nuk
shkulet lehtë nga zemra: “Në një farë mënyre, njerëzimi pret Zotin, afërsinë
e Tij. Por kur arrin çasti i shumëpritur, nuk ka vend për Të. Është kaq i zënë me
vetveten, ka nevojë për kaq shumë kohë e hapësirë për gjërat e veta, sa të mos mbetet
asgjë për të tjerët – për të afërmin, për të varfërin, për Zotin” (Mesha e Natës së
Krishtlindjes, 25 dhjetor 2007). Por Zoti, pohon Benedikti XVI, nuk e lë veten
jashtë këtij takimi. Misteri i Betlehemit – pat thënë disa vjet më parë, në këtë kohë
të vitit – na zbulon Zotin-me-ne, Hyjin e afërt, e jo thjesht në kuptimin kohor, apo
hapësinor. Ai është afër, sepse, si të thuash, është ‘martuar’ me humanitetin tonë: “Gëzimi
i krishterë lind pra, nga kjo siguri: Zoti është afër, është me mua, është me ne,
në gëzime e dhimbje, në shëndet të mirë e në sëmundje, si shok e bashkëshort besnik.
E ky gëzim është i gjallë edhe në sprova, në vetë vuajtjen e, nuk mbetet në sipërfaqe,
por në thellësitë e shpirtit të njeriut, që ia beson veten Zotit e ka shpresë tek
Ai” (Lutja e Engjëllit të Tënzot, 16 dhjetor 2007) Të krishterët, që më shumë
se kushdo tjetër duhet të jenë në gjendje të lenë mënjanë zhurmën e shkëlqimin e rremë
të botës për heshtjen e shpellës së Betlehemit, janë të thirrur ta përtërijnë takimin
me Hyjin, vit për vit, duke ia hapur Atij zemrën: “Ne na takon t’i hapim dy
kanatësh portat për ta pritur. Të mësojmë nga Maria e Jozefi: të vihemi me fe në shërbim
të planit të Zotit. Edhe kur nuk e kuptojmë plotësisht, t’i besojmë urtisë dhe mirësisë
së Tij. Të kërkojmë para së gjithash, Mbretërinë e Hyjit, e Provania Hyjnore do të
na ndihmojë. Për shumë vjet Krishtlindjen të gjithëve!” (Lutja e Engjëllit të Tënzot,
20 dhjetor 2009).