Të shtegtojmë te drita e grazhdit të Krishtlindjes
Bota jonë me fuqinë e ligështitë e veta, me përparimet e krizat, shpresat e ankthet,
është në pritje të hirit shëlbues të Hyjit. Pret një vezullim, që e bën errësirën
dritë. Është drita e Krishtit Fëmijë. Duke u dukur mes nesh, duke depërtuar në kohë
e në histori të njerëzimit, Zoti davarit ankthin e njerëzve, që vijojnë të jetojnë
nën hijen e kërcënimit të vdekjes. E pikërisht “ankthit”, që nuk e le të qetë
shpirtin e njeriut dhe shpresën për të shpëtuar prej tij, i përgjigjet Drita që buron
nga Foshnja Hyjnore e Betlehemit e na siguron se: “Nuk ka errësirë aq të dendur që
rrezja e dritës s’e çan. Këtë e di mirë kulla e vrojtimit që
agun pret e vrojton si lind një ditë e re!”.
E Krishti, nga
Ungjilli i Mateut, na fton: “Ejani tek unë të gjithë ju, që jeni të
lodhur! E unë do t’ju çlodh!”. Mt. 11,28-30
“Ka ditë që ngrysen
errshëm. Mes ditës e ditës shtrihet pa fund nata plot ankth, si gjëma e motit. Zemra
nuk është e fortë, sa koha, n’parzëm ngujuar, pëlcet si zog pa fletë. Zhytur
në errësirë Njeriu vetveten pyet: “Pse të zgjohem? Pse të shpresoj? E
pse u dashka të jetoj? Njeriu puth vdekjen në buzët e ngrira e nis loton në
zgavër të syrit të saj! Si Jobi këlthet nëpër natë: “Ç’kërkoj unë këtu? Ç’kuptim
ka të jetoj? Vëlla, këto ditë e net ti lëshoja frerin zemrës! Jepu shfrim
lotëve... Por sidomos kujto Fjalët e Mësuesit: “O ju, që vuani që shtypeni
nën thembër të njeriut të padrejtë, mos u dëshpëroni! Asgjë nuk ka marrë
fund, gjithçka mund të rifillojë. Shpresa është rrugë e larë me dritë. Ajo
çel shteg dhe në natën më të errët!”.