Ռատիովատիկանի ընդհանուր տնօրէն՝ Յիսուսեան Հայր ֆետերիքօ Լոմպարտի, այս շաբթուայ խբագրականին
մէջ անդրադարձաւ <<Կրօնական ազատութիւն եւ խաղաղութիւն>> նիւթին , մատնանշելով Պենետիկտոս
ԺԶ Սրբազան Քահանայապետի Խաղաղութեան համաշխարհային օրուայ պատգամը։ <<Քրիստոնեաները,
որպէս կրօնական հասարակութիւն, այսօր կը ներկայացնեն հալածանքի ենթարկուող հաւատացեալներու
ամենամեծ թիւը, իրենց հաւատքի հետեւանքով>> ։ Սրբազան Քահանայապետին խաղաղութեան
օրուայ պատգամի ամենէն ազդու նախադասութիւններէն մին է սոյն յայտարարութիւնը, որովհետեւ
շատեր կ՛ապրին այն համոզումով թէ՝ քրիստոնեաները ընդհանրապէս գրաւած են առաջնահերթ դիրքեր
եւ իրենց պատճառաւ միւս կրօններու հետեւորդները կ՛ենթարկուին խտրականութեան։ Մինչ
օրէ օր աճող` վստահելի աղբիւրներէ քաղուած տեղեկութիւններ, մեզ կը հրաւիրեն սրբագրելու
այս տեսակէտը եւ ճշմարտութիւնը յայտնելու։ Այս չէ սակայն, պատգամին կեդրոնական
մասը, որ ինչպէս ամէն տարի լայն հորիզոններով կ՛ուղղուի համայն մարդկութեան բարիքին ի
նպաստ, կոչ ուղղելով մարդու արժանապատուութեան` ամէն անհատի արժանապատուութեան, պահանջելով
անոր հիմնական իրաւունքները։ Արդ՝ Խաղաղութեան համաշխարհային օրուայ պատգամը, միայն
քրիտոնեաներու ուղղուած պատգամ մը չէ, այլ կ՛ընդգրկէ բոլորը, նոյնիսկ չարչարանքի, տառապանքի
եւ մահուան փորձառութիւնը- որ բոլորին համար կը խնդրէ իրաւունքը Աստուած փնտռելու,
ճանչնալու եւ փառաբանելու զինք, ըլլայ անհատապէս ըլլայ հաւաքականութեամբ։ Առանց
այս իրաւունքի գործադրութեան, կարելի չէ ունենալ խաղաղ հասարակութիւն մը։ Մոլեռանդութիւնը`
ծայրայեղութիւնը եւ յարձակողական աշխարհականացումը խաղաղութեան իսկական թշնամիներն են։