Ndeshje në Bjellorusi pas fitores së presidentit Llukashenko. Qindra arrestime.
(20.12.2010 RV)Mijëra opozitorë në shesh, ndeshje e qindra arrestime (mëse
600) karakterizuan mbrëmë e sot në Bjellorusi, fitoren e Aleksandër Llukashenkos,
i cili merr kështu mandatin e katërt si president. Në pushtet që nga viti 1994, Llukashenko,
sipas të dhënave zyrtare, ka fituar 79,7% të votave. Por nga minuti në minut shtohen
akuzat për manipulime të zgjedhjeve. Mijëra protestues u përpoqën të sulmojnë selinë
e qeverisë, të parlamentit e të komisionit zgjedhor, por u ndalën nga policia. Sipas
disa burimeve, 7 ndër 9 kandidatët e opozitës për president janë arrestuar, duke shkaktuar
kështu reagimin e ashpër të Bashkimit Evropian dhe të SHBA-ve. Vëzhguesit e OSBE-së
kanë deklaruar se nuk mund të japin gjykim pozitiv mbi zhvillimin e zgjedhjeve.