Benedikti XVI në Engjëllin e Tënzot flet për Shën Jozefin, njeriun që i besoi plotësisht
Zotit.
(20.12.2010 RV)Shën Jozefi është shembull i njeriut, që ka besim të plotë në
planin e Zotit për shëlbimin e njerëzve. Figura e atit të kujtuar të Jezusit ishte
dje në qendër të reflektimit të Benediktit XVI gjatë lutjes së Engjëllit të Tënzot,
kremtuar, si zakonisht, në Sheshin e Shën Pjetrit, në Vatikan. Papa ia besoi Shën
Jozefit, pajtor i Kishës universale, të gjithë barinjtë e Kishës, që jeta e tyre të
përkojë gjithnjë më shumë me Vetjen e Jezusit.
Shqetësimi i
jashtëzakonshëm i një njeriu të ekuilibruar e thellësisht të drejtë dhe prekja hyjnore,
që ia rikthen qetësinë e humbur, duke i shpjeguar se çka dukej si tradhti personale,
ishte misteri i shëlbimit universal: këto janë dy ndjesitë kryesore që, njëra pas
tjetrës, pushtuan zemrën e Shën Jozefit, para e pas zbulesës së Engjëllit. E ishte
pikërisht Engjëlli ai, që do t’i kumtonte se e fejuara e tij, Maria, do të lindte
një fëmijë, i cili qe paracaktuar të shpëtonte popullin e vet nga mëkatet. Shën Mateu
- shpjegoi Benedikti XVI para lutjes së Engjëllit të Tënzot - na tregon si ndodhi
lindja e Jezusit, duke e parë në këndvështrimin e Shën Jozefit e duke na rrëfyer sesi
hoqi dorë nga mendimi për ta ndarë Marinë, kur Zoti ia hapi sytë për të shikuar
në Të, veprën e Hyjit: “Shën Ambrozi komenton se Zoti e zgjodhi Shën Jozefin,
sepse ëmbëlsia e drejtësia e tij e bënte tejet të denjë në cilësinë e dëshmitarit.
Ndonëse i trazuar thellë në shpirt, Jozefi vepron ashtu si e kishte urdhëruar Engjëlli
i Zotit, i sigurtë se po bënte një gjë të drejtë. Edhe duke ia vënë emrin Jezus
asaj Foshnjeje, që mban në duar mbarë universin, ai radhitet në aradhet e shërbëtorëve
të përvuajtur e besnikë, të ngjashëm me engjëjt e me profetët, me martirët e me apostujt,
ashtu si këndohet në himnet lindore”. Shën Jozefi - vërejti Papa – kumton
mrekullitë e Hyjit, duke dëshmuar virgjërinë e Marisë, dhuratë hyjnore për njerëzit,
e duke u kujdesur për Mesinë në jetën e tij tokësore. Pikërisht kjo e bën të denjë
për nderim, sepse në të.... "Duket njeriu i ri, që duke e shikuar
me besim e guxim të ardhmen, nuk përpiqet të realizojë planet e veta, por lëshohet
plotësisht në dorë të mëshirës së pacak të Atij, që do të vërtetojë profecitë e do
të hapë kohën e shëlbimit”. E pikërisht nga shembulli i Shën Jozefit, pajtor
universal i Kishës, u nis Benedikti XVI, për një ndjet të posaçëm shpirtëror: “Dëshiroj
t’ia besoj të gjithë barinjtë, duke i nxitur t’u ofrojnë besimtarëve të krishterë
e mbarë botës propozimin e përvuajtur e të përditshëm të fjalëve e të gjesteve të
Krishtit (Letra për Shpalljen e Vitit Meshtarak). Uroj që jeta
jonë të shkrihet gjithnjë më shumë me Vetjen e Jezusit, pikërisht sepse Ai, që është
Fjala, mishërohet, vjen nga Zoti si njeri e tërheq pas vetes gjithë ekzistencën njerëzore,
duke e çuar brenda Fjalës së Zotit”. Në përfundim të përshëndetjeve në
gjashtë gjuhë të ndryshme, Papa u drejtoi të gjitha grupeve, mbledhur në Sheshin e
Shën Pjetrit, urimet më të mira për festat: “Të gjithëve u uroj të diele
të gëzuar e Krishtlindje të qetë, në dritën e paqes së Zotit!”.