Në Jeruzalem, hebrenjtë e të krishterët bisedojnë për frytet e Sinodit kushtuar Lindjes
së Mesme.
(17.12.2010 RV)Të mërkurën e kaluar, pranë selisë së Institutit për studime
izraelite, në Jeruzalem, u mbajt takimi i Asamblesë së ipeshkvijve katolikë në Tokën
Shenjte dhe Qendrës së Jeruzalemit për dialogun ndërmjet hebrenjve e të krishterëve,
ku u fol për Sinodin e Ipeshkvijve kushtuar Lindjes së Mesme, mbajtur në Vatikan më
10 deri më 24 tetorin e kaluar. Në takim morën pjesë, ndërmjet tjerësh, nunci apostolik
në Izrael, imzot Antonio Franko; mëkëmbësi patriakal latin për Izraelin, imzot Xhaçinto-Bulos
Markuco; përfaqësuesi i Ministrisë së Brendshme të Izraelit, Cesar Marjieh dhe përfaqësuesi
i Ministrisë së Jashtme, Bahij Mansur. Para se të fillonte punimet, asambleja kujtoi
themeluesin e Qendrës së Jeruzalemit për marrëdhëniet ndërmjet hebrenjve e të krishterëve,
vdekur më 3 nëntorin e kaluar, që dha një kontribut të shquar për fillimin e dialogut
ndërmjet dy religjoneve të mëdha. Folën disa nga personalitetet më të njohura
të Kishës katolike si dhe përfaqësues të hebrenjve në Tokën Shenjte, duke vënë theksin
mbi sfidat e reja që duhet të përballojë Kisha katolike si dhe mbi nevojën për një
njohje më të thellë ndërmjet të krishterëve e hebrenjve.