Пасланне Бэнэдыкта XVI на 44 Сусветны дзень міру: рэлігійная свабода — шлях да міру
«Рэлігійная свабода
— гэта шлях да міру», таму «належыць асуджаць не толькі ўсялякія формы рэлігійнага
фанатызму і фундаменталізму, але таксама фундаменталізм і варожасць у адносінах да
вернікаў, што абмяжоўвае публічную ролю вернікаў у грамадскім і палітычным жыцці»,
— гаворыцца ў пасланні Святога Айца Бэнэдыкта XVI на 44 Сусветны дзень міру, які будзе
адзначацца 1 студзеня 2011 г. Пасланне было прэзентавана ў Ватыкане 16 снежня 2010
г.
У пасланні Папа кажа не толькі аб адсутнасці і абмежаваннях рэлігійнай свабоды
ў краінах Азіі і Афрыкі, але і аб «больш рафінаваных формах варожасці да рэлігіі»,
выражэннем якіх у заходніх краінах становіцца «выключэнне рэлігійнай гісторыі і сімвалаў».
Святы Айцец выказвае надзею, што на Захадзе, асабліва ў Еўропе, «будзе пераможана
варожасць і забароны для хрысціян, якія паходзяць з таго, што тыя жадаюць перажываць
сваё жыццё спосабам, згодным з каштоўнасцямі і прынцыпамі, заключанымі ў Евангеллі».
Пантыфік
падкрэслівае значэнне міжрэлігійнага дыялога, мэтай якога з’яўляецца агульнае дабро.
«Касцёл не адвяргае нічога з таго, што праўдзівае і святое ў розных рэлігіях», — нагадвае
Папа і перасцерагае, што гэта, аднак, не азначае рэлігійнага рэлятывізму або сінкрэтызму.
З
клопатам кажучы аб сітуацыі ў Іраку, Бэнэдыкт XVI узгадвае атаку на сіра-каталіцкую
катэдру ў Багдадзе 31 кастрычніка, падчас якой былі забіты два святары і шмат вернікаў.
Папа і ўвесь Касцёл, як адзначаецца, духоўна яднаюцца з іракскімі хрысціянамі, і гэта
пацвярджае пасяджэнне Спецыяльнага Сіноду Біскупаў для Блізкага Усходу, якое праходзіла
ў Ватыкане ў кастрычніку гг. Пантыфік заклікае католікаў да малітвы за «братоў у веры,
якія зведваюць насілле і неталерантнасць», і да салідарнасці з імі. Папа з болем сцвярджае,
што «ў некаторых рэгіёнах свету немагчыма свабодна вызнаваць і выражаць сваю рэлігію
без рызыкі страты жыцця і асабістай свабоды».
Па словах Святога Айца, у свабодзе
веравызнання знаходзіць выражэнне «спецыфіка чалавечай асобы, якая дзякуючы ёй можа
надаць кірунак свайму асабістаму і грамадскаму жыццю; у святле Бога становіцца цалкам
зразумелай адметнасць, сэнс і мэта існавання асобы». Бэнэдыкт XVI указвае на цесную
сувязь паміж свабодай і павагай да іншага чалавека і дадае, што свабода, якая варожа
ставіцца да Бога, пярэчыць у канчатковым выніку самой сабе і не гарантуе поўнай павагі
да бліжняга. Таксама Папа аспрэчвае меркаванне, што «маральны рэлятывізм можа быць
шансам на мірнае суіснаванне»: у сапраўднасці ён выклікае падзелы і адмаўленне чалавечай
годнасці. У чалавечай асобе, па словах Пантыфіка, неабходна бачыць два вымярэнні:
рэлігійнае і грамадскае, таму важна стварыць умовы для таго, каб вернікі маглі сумясціць
сваё рэлігійнае жыццё з грамадскай дзейнасцю.
Святы Айцец піша таксама пра
рэлігійнае выхаванне і ролю ў гэтым сям’і: «Бацькі павінны заўсёды мець магчымасць
свабодна, без прымусу, і адказна перадаць дзецям уласную спадчыну веры, каштоўнасці
і культуры».
Як адзначае Бэнэдыкт XVI, свабода веравызнання з’яўляецца базавай
у палітычнай і прававой культуры. Міжнароднае права не дапускае ніякіх адступленняў
ад прынцыпаў рэлігійнай свабоды, і рэлігійныя правы маюць такі ж статус, як права
на жыццё і на асабістую свабоду. Папа кажа аб небяспеках, якія паходзяць з інструменталізацыі
свабоды веравызнання, калі маскіруюцца схаваныя інтарэсы, напрыклад, захаванне ў дзяржаве
ўстаноўленага парадку або атрыманне ўлады нейкай палітычнай групай. «Вызнаванне рэлігіі
не можа быць выкарыстана як інструмент», — падкрэслівае Святы Айцец.
У пасланні
гаворыцца аб укладзе хрысціян у развіццё цывілізацыі, дзякуючы чаму «асобы і народы
атрымалі свядомасць сваёй адметнасці і годнасці, а таксама паўсталі дэмакратычныя
арганізацыі, былі сфармуляваны правы чалавека і адпавядаючыя ім абавязкі». Таксама
і сёння хрысціяне абавязаны ўдзельнічаць у грамадскім, эканамічным і палітычным жыцці
і даваць сведчанне любові да бліжняга.
Па словах Папы, палітыка і дыпламатыя
таксама павінны «прымаць пад увагу маральную і духоўную спадчыну вялікіх рэлігій свету,
каб пацвердзіць праўду і ўніверсальныя каштоўнасці». Пантыфік заклікае лідэраў вялікіх
рэлігій і ўсіх адказных за народы дзейнічаць на карысць «абароны свабоды веравызнання,
асабліва рэлігійных меншасцяў, якія не ствараюць пагрозы для адметнасці большасці,
але, наадварот, ствараюць магчымасці для дыялога і ўзаемнага ўзбагачэння культур».
«Няхай
Еўропа паяднаецца са сваімі хрысціянскімі каранямі (…), каб можна было жыць у справядлівасці,
згодзе і міры, праводзячы шчыры дыялог з усімі народамі», — чытаем у пасланні. На
заканчэнне Папа падкрэслівае, што рэлігійная свабода з’яўляецца «сапраўдным шчытом
міру». «Каб усе людзі і грамадствы ва ўсіх канцах зямлі змаглі ў хуткім часе карыстацца
свабодай веравызнання, якая ёсць шляхам да міру!» — такое пажаданне выказвае Бэнэдыкт
XVI.