Бэнэдыкт XVI спадзяецца на паглыбленне каталіцка-лютэранскага дыялогу
Надзею на паглыбленне
каталіцка-лютэранскага дыялогу выказаў сёння Бэнэдыкт XVI, прымаючы на аўдыенцыі прадстаўнікоў
Сусветнай лютэранскай федэрацыі – яе старшыню біскупа Муніба Юнана і генеральнага
сакратара пастара Марціна Юнгэ, якія нядаўна прыступілі да выканання сваіх абавязкаў.
Бэнэдыкт
XVI нагадаў, што на пачатку свайго пантыфікату, ён меў магчымасць сустрэцца з былым
кіраўніцтвам Сусветнай лютэранскай федэрацыі. Ён адзначыў, што бягучы тэалагічны дыялог
і практычнае супрацоўніцтва, асабліва на мясцовым узроўні, дазволілі ліквідаваць перашкоды
і стымуляваць сувязі бачнага адзінства. "На працягу гадоў падрыхтоўкі да пяцісотгоддзя
падзеяў 1517 года католікі і лютэране закліканы нанава прааналізаваць куды завёў нас
шлях да адзінства і маліцца за Божае кіраўніцтва і дапамогу ў будучыні", - сказаў
Папа.
Святы Айцец з задавальненнем адзначыў, што Міжнародная лютэранска-каталіцкая
камісія па адзінстве падрыхтуе сумесны тэкст, які стане дакументальным сведчаннем
таго, што католікі і лютэране могуць разам сказаць у дачыненні да нашых блізкіх адносін,
пасля амаль пяці стагоддзяў падзелу.
Лютэране з'яўляюцца трэцяй па колькасці
хрысціянскай супольнасцю разам з католікамі і праваслаўнымі. У Сусветную лютэранскую
федэрацыю на сённяшні дзень уваходзяць 140 Цэркваў з 79 краін, якія прадстаўляюць
каля 70 мільёнаў вернікаў. Штаб-кватэра федэрацыі знаходзіцца ў Жэневе. Вышэйшым органам
з'яўляюцца агульныя сходы, якія адбываюцца раз на на шэсць гадоў.