Shqipëria hedh poshtë akuzat e Dik Martit për Thaçi
Kryeministri i Shqipërisë Sali Berisha e Kryetarja e Kuvendit Jozefina Topalli hedhin
poshtë akuzat e ngritura nga raportuesi i KE, Dik Marti, për Kryeministrin e Kosovës,
Hashim Thaçi. Në një raport të tij, Marty e identifikon kreun e ekzekutivit kosovar
si bos të mafias në Kosovë. Qëndrimi i autoriteteve shqiptare erdhi gjatë takimeve
që ata patën me Drejtorin e Përgjithshëm për Demokracinë dhe Çështjet Politike në
Këshillin e Evropës, Zhan Lui Lorans (Jean Louis Laurens). Berisha e konsideroi të
pabazuar në fakte raportin e Dik Marti, ndërsa akuzoi këtë të fundit për anshmëri
politike dhe për abuzim flagrant me autoritetin e Këshillit të Evropës. "Raporti i
anëtarit të Asamblesë Parlamentare të Këshillit të Evropës Dik Marti është një raport
totalisht i pabazuar në asnjë fakt, evidencë apo realitet, çka dëshmon për një anësim
politik të qartë të autorit, duke përbërë abuzim flagrant me autoritetin e Këshillit
të Evropës", tha Berisha. Në të njëjtën linjë me kryeministrin Berisha edhe kryeparlamentarja
e Shqipërisë Topalli. Gjatë një takimi të zhvilluar me Zhan Lui Lorans ajo konfirmoi
të njëjtin qëndrim lidhur me raportin e deputetit zviceran. Sipas zonjës Topalli ky
raport është i pabazuar në asnjë fakt, dhe dëshmon shpërdorim të paprecedent të detyrës
nga ish prokurori Dik Marti. "Nëse deputeti nuk paraqet fakte për ato që ka shkruar
dhe nuk i paraqet këto në Gjykata, do të ishte në nderin e Këshillit të Evropës, të
kërkojë një ekspertizë mjeko ligjore për Reporterin zviceran, si dhe një hetim tërësor
rreth rrethanave që kanë shtyrë Dick Marty të prodhojë një raport të tillë . Raporti
i Dik Martit është i pabazuar në fakte dhe dëshmon shpërdorim të paprecedent të detyrës
nga ai", tha Topalli.