“Drejt Krishtlindjes: shtegtim atje, ku dashuria e Zotit iu dëftua mbarë botës”:
Kush je ti?
Njeri, mos mendo kurrë se je i vetëm. Zoti të ndjek me sy ngado që shkon. Të thërret
me emër. Edhe atëherë kur nuk e dëgjon, sepse nuk dëshiron ta dëgjosh. Të shikon e
të kupton. Të njeh më mirë se e njeh ti vetveten. Është ai, që të krijoi! Prandaj
ta di gjithçka të zjen në kokë e në zemër. Mendimin. Tundimin. Forcën. Ligështinë.
Të ndjek me sy në ditët e gëzimit e të trishtimit. E ke pranë, në shpresë e dëshpërim.
Interesohet për çdo ankth tëndin, për çdo rënie e lartim të shpirtit. Zoti e di edhe
sa fije flokësh ke në kokë: t’i ka numëruar. Ai të mban në krahë, kur rrezikohesh
të rrëzohesh e të vë rishtas në tokë, që të mund të ecësh, atje ku duhet ecur. E vëren
edhe shprehjen e fytyrës sate: e di kur qesh e kur qan, kur je shëndosh e kur je
i sëmurë. Ai t’i ruan këmbë e duar, ta dëgjon zërin, rrahjen e zemrës e deri frymëmarrjen.
Ti nuk mund ta duash kurrë vetveten, aq sa të do ai, që të krijoi. Kur ty të dhemb,
atij i dhemb edhe më tepër e kur të mërzitet vetja, ai të merr butë mbi shpatulla
e të çon atje, ku të pret një e mirë e madhe, e papritur. Ti nuk je vetëm krijesë.
Je njeri i rilindur e i shenjtëruar, je biri i Tij në shpirt, i përshkuar nga një
rreze lumnie e bekimi, që zbret papushim nga Biri i vetëm i Hyjit. Je një nga ata,
për të cilët Krishti lindi në Shpellën e Betlehemit, për të derdhur, më pas, edhe
gjakun e vet të paçmueshëm. Ky je ti, o njeri i të gjitha moteve!