(15.12.2010 RV)Krerët e UÇK-së në Kosovë janë përgjegjës për trafik organesh
në fund të viteve ’90. Kjo akuzë e rëndë gjendet në raportin e përpiluar nga zvicerani
Dik Marti, i cili ka hetuar çështjen për llogari të Këshillit të Evropës. Sot, raporti
ndodhet i publikuar përmbledhtas në faqen e internetit të Asamblesë së këtij Këshilli,
i cili do ta diskutojë nesër. Sipas Dik Martit, i cili ka shqyrtuar dokumente dhe
ka dëgjuar dëshmitarë për problemin, kryeministri aktual Hashim Thaçi dhe ish-liderë
të tjerë të UÇK-së janë përfshirë në biznese të ndryshme të kriminalitetit të organizuar,
nga droga, tek trafiku i armëve e ai i organeve. Disa nga këto aktivitete, vazhdohen
edhe sot, në bashkëpunim me grupe kriminelësh në vendet fqinjë, sidomos në Serbi e
Shqipëri. Përmenden me emra përgjegjësi i shëndetësisë e krerë të tjerë të UÇK-së,
që janë marrë me organizimin e trafikut të organeve, në bashkëpunim me përfaqësues
ndërkombëtarë e me klinika në Shqipëri. Dik Marti sqaron se hetimi filloi nga shënimet
e ish-kryeprokurores së Hagës, Karla del Ponte, e cila kishte shprehur në ditarin
e vet dyshimet për trafikun e organeve në Kosovë. Bashkimi Evropian, përmes zëdhënëses
së Përfaqësueses së Lartë për politikën e jashtme dhe sigurinë, Kathrin Eshton, deklaroi
sot se i merr shumë seriozisht akuzat kundër liderëve kosovarë. Maja Kocijançiç e
ftoi autorin e dokumentit të paraqesë provat para organeve kompetente. Ndërkaq, qeveria
e Prishtinës i ka hedhur poshtë të gjitha akuzat, duke i interpretuar si përpjekje
e serbëve për diskriminimin e udhëheqjes kosovare.