(15.12.2010 RV)I jati, Klement di Roza, ishte sipërmarrës breshian. E ëma,
Kamila Albani, fisnike bergamaske. Vdiq kur Paola ishte vetëm 11 vjeçe. Në këtë moshë
vajza hyri në kolegjin e Vizitacionit, për të vijuar studimet. Doli që aty në moshën
17 vjeçare. I jati e priti me padurim, për ta parë nuse. Po vasha tashmë e kishte
zgjedhur Dhëndrrin, duke bërë, që në Institut, kushtin e pastërtisë. Atëherë i jati
e caktoi të drejtojë një fabrikë për tjerrjen e mëndafshit, pronë e familjes. Por
Paola, më shumë se fabrikës, i kushtoi vëmendje nevojtarëve dhe edukimit fetar të
32 vajzave, që u mblodhën reth saj, duke formuar kështu, bërthamën e një kongregate
të ardhshme rregulltare. Bashkë me ta e me disa infermiere vullnetare, punoi pa kursyer
as jetën për të ndihmuar viktimat e kolerës së vitit 1836, duke themeluar edhe dy
shkolla për shurdh-memecët. Vendi ku jetoi shenjtorja e ardhshme, ndonëse njihej me
emrin Mbretëria Lombardo-Venete, ishte nën sundimin austro-hungar. Qeverisej nga
arkiduka Ranieri i Habsburgëve, me titullin zëvendës-mbret. Austriak, edhe kryipeshkvi
i Milanos, kardinali Gaetano Gaysruck, shpesh në polemikëme sundimtarët. E pikërisht
kundër këtyre sundimtarëve, shumë shpejt shpërthen pakënaqësia popullore. Paola, përkrah
njerëzve të vet, jep një ndihmë të pallogaritshme, sidomos në pranverën e tmerrshme
të vitit 1849, gjatë ‘dhjetë ditëve’, kur qyteti ngre krye me armë në dorë kundër
austriakëve. Në vitin 1851 bashkësia, që u grumbullua rreth Paolës, u njoh si
Kongregata rregulltare e “Shërbëtoreve të dashurisë së krishterë”. Më 1852 Paola Françeska
bëri kushtet e përjetshme, duke ndërruar edhe emrin. Mbeti në historinë e Kishës si
Motra Maria e Kryqëzuar. Vdiq në moshën 42 vjeçare, në vitin 1855. Piu XII Paçeli
do ta shpallte Shenjtore në vitin 1954. Reliket e Shën Paolës nderohen në Shtëpinë-nënë
të Kongregatës së saj. “Lindur në Bresha, Shën Maria e Kryqëzuar di Roza, virgjër,
ia kushtoi të gjitha pasuritë e të gjithë vetveten, shpëtimit shpirtëror e material
të të afërmit, duke themeluar edhe Institutin e Shërbëtoreve të dashurisë së krishterë”
– kështu e pikturon portretin e saj, Martiriologu Romak. Simboli i Shën Paolës
di Roza është ai i virgjëreshave: zëmbaku i bardhë.