Papa: në Ungjill kemi Fjalën përfundimtare të Zotit
“Jezusi është Fjala përfundimtare e Zotit drejtuar njerëzve, sepse duke na dhuruar
personalisht vetveten na ka treguar fytyrën e vërtet të Atit”. Kështu pohoi Benedikti
XVI në homelinë e Meshës kremtuar dje më 14 dhjetor në mëngjes në kuvendin “Mater
Ecclesiae” në Vatikan, me rastin e festës së shën Gjonit të Kryqit e në 400 vjetorin
e themelimit të urdhrit të Motrave të Vizitacionit. Në homeli, botuar në gazetën
l’Osservatore Romano, Ati i Shenjtë vuri në pah se si i tërë misteri i fesë së krishterë
është një i vetëm dhe kujtoi se “në Besëlidhjen e Vjetër ishin shumë forma në të cilat
Hyji shfaqej dhe i afrohej popullit të vet: ndër to, janë vegimet dhe fjalët profetike”.
“ E gjithçka – shpjegoi Papa – është pa dyshim një shprehje e madhe e pasurisë së
dëftimit, në të cilin shfaqet një aspekt i misterit hyjnor”. Derisa në Besëlidhje
të Re, “më nuk kemi shumë mënyra përmes të cilave Zoti ka fol”. Për Benediktin XVI,
pikërisht “ është në Jezusin, në Krishtin Hyji bëri të dëgjohet Fjala e tij”. Vërtet,
“në Besëlidhjen e Re Hyji nuk ka thënë diçka më tepër, mirëpo fjala e tij është vet
i Biri. Në Të njerëzimi mundi të njihte fytyrën e tij, fytyrën e Zotit Trini”. Prandaj
sipas Atit të Shenjtë, “ thirrja e njeriut, është pikërisht ajo e hyrjes së tij në
këtë tërësi, dhe të lejon të preket e të depërtohet në brendësi nga pasuria e dhuratës
së vet Zotit”. Së bashku me Papën bashkëkremtuan dje edhe sekretari i tij i veçantë
mons. Goerge Gaemswein e mons. Alfred Xuereb nga sekretaria e posaçme me prelat tjerë
nga Sekretaria e Shtetit të Vatikanit. Në mbarim të meshës, motër Maria Begona Sanchom,
eprore e kuvendit, në emër të të gjitha murgeshave i dhuroi Papës një kryq argjendi,
ardhur nga Annecy me reliket e shën Françeskut Sales, shën Gjovana de Dcantall e shën
Marherita Maria Alacoque.