Papa në audiencën e përgjithshme, kushtuar Shën Veronika Gjulianit: vdekja nuk është
fjala e fundit e jetës!
(15.12.2010 RV)Ta ngrohim zemrën me Eukaristinë, me bindjen se vdekja nuk është
fjala e fundit mbi jetën njerëzore. Në audiencën e sotme të përgjithshme, mbajtur
në Sallën e Palit VI, në Vatikan, Benedikti XVI i propozoi përsëri Kishës bashkëkohore
të fshehtën e Shën Veronikës Gjuliani. Papa foli për jetën shpirtërore të mistikes,
350 vjet pas lindjes së saj. Ky jubile i Veronikës, që ishte shumë e njohur në shekullin
e 17-të, do të kremtohet më 27 dhjetorin e ardhshëm.
“Të përflakesh
nga dashuria për Krishtin. Ta duash me të gjithë forcën, aq sa mund ta lejojë korpi
e shpirti njerëzor. T’ia dhurosh vetveten deri në atë masë, sa, në një farë mënyre,
ta grisësh velin, që të pengon të shikosh Parajsën”. Ky ishte caku, ku dëshironte
të arrinte shpirti i Veronika Gjulianit. Zemra e saj, e dashuruar me Jezusin që në
vashëri e deri në vdekje, në vitin 1727, pas 50 vjetësh të jetuara në manastirin e
Klariseve të Qytetit të Kastelos, në Umbria të Italisë, ishte vendi – tregoi Papa
– në të cilin ndërthuren vuajtjet e saj të mëdha dhe përvoja mistike lidhur me Mundimet
e Krishtit. Ditari i Veronikës, me 22 mijë faqe, dorëshkrim pa asnjë shlyerje e asnjë
korrigjim, të krijon përshtypjen e një vale mendimesh, që derdhej pa asnjë pengesë
mbi kartë, zbulon – shpjegoi Benedikti XVI – rrënjën e një përshpirtërie tipike kristologjiko-sponsale: “Është
përvoja e njeriut, që provon se Krishti, Dhëndërr besnik e i sinqertë, e do e pret,
si përgjigje, një dashuri gjithnjë më të thellë e më të pasionuar. Në të gjithçka
interpretohet me çelësin e dashurisë, e kjo i ndikon në shpirt një paqe qiellore.
Gjithçka jetohet në bashkim me Krishtin, për dashuri të Tij e me gëzimin se kështu
mund t’i dëshmosh se e do, aq sa mund të dojë një krijesë njerëzore”. Figura
e Jezusit, me të cilën Veronika ndjehet thellësisht e bashkuar, është ajo që e paraqet
në çastin kur i dhurohet Atit për shpëtimin e Kishës e të njerëzimit. Mistikja e
madhe - tha Papa – përpiqet t’i përngjasë, lutet, vuan, kërkon varfërinë e shenjtë,
bën çmos të zhvishet krejt nga vetvetja, ta humbasë veten, pikërisht për t’u bërë
si Krishti: “Zemra e saj është aq e madhe, sa t’i zërë të gjitha
nevojat e Kishës Shenjte e ta jetojë me ankth dëshirën për ta parë shëlbimin e gjithë
botës. E pushtuar nga dashuria, komunikon me motrat e kuvendit plot vëmendje, mirëkuptim,
ndjesë. I ofron lutjet e flijimet për Papën, ipeshkvin e saj, për meshtarët e për
të gjithë njerëzit nevojtarë, duke përfshirë edhe shpirtrat e purgatorit. Shenjtorja
jonë e koncepton këtë mision si të ishte ndërmjet njerëzve e Zotit, ndërmjet mëkatarëve
e Krishtit të Kryqëzuar”. Në një lartim të vazhdueshëm mistik, Veronika
rijeton përvojën e Kryqëzimit e të plagëve të Zotit. E pra – theksoi Papa - një lartim
kaq i jashtëzakonshëm, nuk e çoi kurrë shpirtin e saj në egoizëm shpirtëror: “Në
krahasim me predikimin e epokës, që shpesh përqendrohej tek shëlbimi i shpirtit në
terma individuale, Veronika tregohet thellësisht solidare, mendon për bashkimin e
të gjithë vëllezërve e motrave në udhën drejt qiellit, jeton, lutet e vuan për të
gjithë”. Të prek thellë – vijoi Benedikti XVI – përkimi i plotë me vegimet
e Shkrimit Shenjt. Prandaj përvoja e Mistikes na udhëheq për një lexim më të thellë
të tekstit të shenjtë. Kështu, kur Veronika Gjuliani ndalohet tek një fragment i
Shën Palit, të duket sikur dëgjon vetë Apostullin, deri në pohimin: “Asgjë
nuk mund të më ndajë nga vullneti i Zotit, as ankthet, as vuajtjet, as mundimet, as
përbuzjet, as tundimet, as njerëzit, as djajtë, as errësira, e as vetë vdekja, sepse
në jetë a në vdekje, e dua gjithçka, e në gjithçka, dua vullnetin e Zotit”. E kjo
na siguron se vdekja nuk është fjala e fundit e jetës, sepse, në vullnetin e Zotit,
jemi të caktuar për jetën e pasosur”. Të kujton aq shumë ky fragment fjalët
e Shën Palit: “As vdekja, as jeta, as ëngjëjt as pushtetet, as e tashmja, as e ardhshmja,
as fuqitë, as lartësitë as humnerat e asnjë krijesë tjetër, nuk do të mund të na ndajë
prej dashurisë së Hyjit, që na u dëftua në Jezu Krishtin, Zotin tonë” (Rom 8,35-39).
E njëjta siguri. Gëzimi i thellë që i prin apostullit, është edhe gëzimi, që i prin
mistikes në të gjitha ngjarjet e jetës, të cilat i jeton me bindjen: asgjë nuk do
të mund të më ndajë prej dashurisë së Hyjit. E kjo dashuri, pasuria e vërtetë e jetës
njerëzore është edhe pasuria që na lë trashëgim mistikja e gjashtëqindës, e cila na
fton ta thellojmë në jetën tonë të krishterë, bashkimin me Zotin, duke e lëshuar
plotësisht vetveten në duart e tij, me besim të patundur, e duke qenë gjithnjë në
bashkim të ngushtë me Kishën, Vashën e Krishtit: “Na fton të ushqehemi ditë
për ditë me Fjalën e Zotit, për ta ngrohur zemrën e për ta orientuar jetën tonë. Fjalët
e fundme të Shenjtores mund të konsiderohen si sintezë e gjithë përvojës së saj të
pasionuar mistike: “Gjeta dashurinë! Dashuria më la ta shoh!”. Në fillim
të audiencës, Benedikti XVI shpjegoi pse u largua përkohësisht nga epoka mesjetare,
prej kohe objekt i katekizmave të tij, për të paraqitur një figurë të shekullit të
17-të. E kujtoi mistiken, duke pasur parasysh se dioqeza e Qytetit të Kastelos po
përgatitet të kremtojë, me veprimtari shumë të pasura, 350-vjetorin e ditëlindjes
së Shenjtores, që pa dritën së pari, më 27 dhjetor 1660. Gjatë përshëndetjeve,
Papa iu drejtua posaçërisht besimtarëve të Umbries, të pranishëm në Sallën e Palit
VI si dhe ipeshkvit të tyre, imzot Domeniko Kançian. Përshëndeti edhe pjesëmarrësit
në Kongresin ndërkombëtar të baritorisë për artistët e cirkut dhe zbutësit e kafshëve
të egra, që vijon në Vatikan, përshëndetje së cilës artistët iu përgjigjen me një
numër akrobatik, realizuar nga katër ekuilibristë, që u duartrokit stuhishëm nga
Papa dhe pjesëmarrësit në audiencë.