“Drejt Krishtlindjes: shtegtim atje, ku dashuria e Zotit iu dëftua mbarë botës”: Psalmi
i Kohës së Ardhjes, pj. II-III.
(10.12.2010 RV)Në meditimin e 11-të, folëm për pjesën I të Psalmit 84(85) të
Kohës së Ardhjes. Por pjesët kryesore, që përmbajnë gjithë mistikën e profecinë,
janë dy të fundit. Psalmisti, e me të, gjithë populli, dëgjojnë një zë, që u flet:
9. Do të dëgjoj ç’ thotë Zoti Perëndi; paqën kumton
për popullin e vet, për besnikët e vet e për ata që me zemër kthehen nga
ai... Deri tani pati folur populli, duke i shprehur Zotit mirënjohjen, sepse
e mori në duar fatin e tij e ia fali mëkatet e duke i kërkuar të rikthehet në gjirin
e fisit të Jakobit, për ta shpëtuar, për ta mbushur me gëzimin e jetës. Tani nis
të flasë vetë Zoti, që i përgjigjet popullit të vet në lutje. Nuk i flet drejtpëdrejt.
Zëri i Zotit nuk dëgjohet. Është Psalmisti ai që, duke folur në vetën e parë njëjës,
bëhet zë i Zotit e i përgjigjet popullit të Besëlidhjes. Përgjigje e pazakontë,
që nis me pyetje, me ftesën për t’i hapur mirë veshët. E është pikërisht kjo grishje,
që krijon atmosferën e heshtjes, të dëgjimit, të pritjes së paduruar të një lajmi
të madh. Është atmosfera e Kohës kishtare që po jetojmë: 10. Është fare pranë
shpëtimi, për ata që e druajnë, e lumnia e tij do të shtrihet në tokën tonë.
11. Mëshira e e vërteta do të përqafohen; drejtësia
e paqja do të merren ngrykë,
12. e vërteta do të
të mugullojë nga toka, nga qielli do të nxjerrë kokën drejtësia.
13.
Kur Zoti do të falë të mirat e veta, toka jonë do të japë fryte të begata.
14.
Përpara tij do të ecë drejtësia, mbas gjurmave të tij, do të vijë shpëtimi”.
Kështu flet Zoti, Thotë: paqe! Kërkon drejtësi për popullin e vet. Dëshiron
ta falë, ta dëgjojë, ta dojë, të bashkohet me të, që të mos e humbasë kurrë më rrugën
e drejtë. E ia hap qiellin e vet pa anë e pa fund - njeriut që i fal zemrën. Prej
këndej premtimi hyjnor arrin kulmin me kumtimin e ardhjes së Birit të Zotit, parafolur
nga Izaia Profet: “Atë ditë rrënja e Jeseut do të ngrihet porsi flamur për popujt;
fiset do ta kërkojnë me etje; trolli i saj do të jetë i lavdishëm”. Atë ditë thuaj:
“Të falënderoj, o Zot! Ti më ngushëllove!” (Is. 11,10; 12,1).