(06.12.2010 RV)Bregu i Fildishtë është një vend në prag të luftës civile, pasi
dje si presidenti aktual Gbagbo, ashtu edhe kandidati i opozitës Ouatarà e deklaruan
veten fitimtarë të zgjedhjeve presidenciale e secili emëroi kryeministrin e vet. Sot
paradite u rihapën kufijtë, të cilat ishin mbyllur që prej një jave, për shkak të
dhunës gjatë zgjedhjeve. Për një dëshmi mbi situatën në vend të dëgjojmë një
misionar italian me telefon nga Bouakè, i cili për arsye sigurie, preferon
të mbetet anonim: Këtu gjendja është e qetë, në kuptimin që njerëzit kanë qëndruar
në shtëpi gjatë fundjavës. Qyteti është gati i shkretë. Ka pasur manifestime, por
pa dhunë. Mbretëron atmosfera e pritjes, ka tension: duam të dimë si do të përfundojnë
gjërat. Është një moment konfuzioni i madh politik? Si e përjetojnë njerëzit?
A kanë frikë? Ka frikë, pasiguri e nuk e dimë si do shkojë puna. Gjithsesi,
përsa u përket të krishterëve, dje, ipeshkvi i Bouakèsë na mblodhi në katedralen e
mbushur plot dhe na bëri thirrje për bashkim, u bëri thirrje gjithë të krishterëve
të luten, që në Kishë të mos kemi ndarje për shkak të etnisë, të kombësisë, apo të
përkatësisë politike. Na tha të mos përzihemi me këto probleme. Duhet të lutemi –
shtoi ipeshkvi – që Trupi diplomatik dhe bashkësia ndërkombëtare të takohen me palët,
t’i pajtojnë e të arrijmë më në fund në një president të vetëm. Mendimi juaj
personal mbi të ardhmen e Bregut të Fildishtë? Kam besim. Bëj thirrje që të
mos ndahemi sipas etnisë, apo përkatësisë politike, por të lutemi që të mos ketë manifestime
të dhunshme e derdhje gjaku. Bëj thirrje që të huajt të priten, siç priteshin më parë.
Afrika është një familje e madhe: jemi të gjithë vëllezër e motra. Duhet të kthehemi
tek këto parime, të gjejmë një zgjidhje pa gjak.