Papa: ta dëgjojmë zërin e Zotit në shkretëtirën e botës së sotme
Si Gjon Pagëzuesi, ta dëgjojmë zërin e Zotit në shkretëtirën e botës. Këtë kërkoi
Papa, duke shpjeguar kuptimin e kohës liturgjike të Ardhjes besimtarëve të mbledhur
sot në sheshin e Shën Pjetrit në Vatikan në mesditë për lutjen e Engjëllit të Tënzot. “Në
kohën e ardhjes – tha Papa – edhe ne jemi të thirrur ta dëgjojmë zërin e Zotit, që
jehon në shkretëtirën e botës përmes Shkrimeve të Shenjta, posaçërisht kur këto predikohen
me forcën e Shpirtit të Shenjtë”. “Të dashur miq – nënvizoi Ati i Shenjtë Benedikti
XVI , sikur ka shkruar Romano Guardini...’Shpëtimtari erdhi nga liria e Zotit..Kështu
vendimi e përcaktimi i fesë qëndron...në pranimin e Atij që po afrohet’. “Shëlbuesi,
shton teologu italiano-gjerman, - theksoi Benedikti XVI – vjen pranë çdo njeriu: në
gëzimet e në trishtimet e tij, në njohjet e tij të qarta, në dyshimet e tundimet,
në çdo gjë që e përbën natyrën e tij e jetën e tij”. Si shembull dëgjimi, Papa
Racinger përmendi Zojën e Bekuar e kujtoi se lutja e 8 dhjetorit të ardhshëm, në festën
e Zojës së Papërlyer, do të shqiptohet nën shtyllën e Zojës që gjendet në sheshin
Spanja në Romë.