Казахстан: кардынал Бэртонэ заклікаў католікаў заставацца верным хрысціянскай спадчыне
Да вернасці хрысціянскай
духоўнай і культурнай спадчыне і, ў той жа час, адаптаванню да новых патрабаванняў
заклікаў католікаў Караганды кардынал Тарчызіо Бэртонэ. Знаходжанне ў горадзе, наведванне
будаўнічай пляцоўкі новага катэдральнага касцёла, кляштару кармелітанак і Эўхарыстыя
ў былой катэдры св. Юзафа, сталі апошнім пунктам візіту кардынала Дзяржсакратара ў
Казахстан.
У сваёй гаміліі кардынал Бэртонэ адзначыў, што асновай усіх сацыяльных
адносін павінна быць павага правоў кожнага грамадзяніна. Ён заклікаў католікаў Казахстана
жыць духам супольнасці паміж сабой і ў адносінах з іншымі грамадзянамі краіны. "Гэтую
любоў, якая ўмацоўваецца ля стала Эўхарыстыі, трэба сведчыць у братняй любові і служэнні
бедным, хворым і адкінутым. Стварайце магчымасць сустрэч, паяднання і міру паміж рознымі
групамі і асобамі, клапоцячыся аб сапраўдным дыялогу, каб усё больш адкрывалася праўда",
- сказаў бліжэйшы супрацоўнік Бэнэдыкта XVI.
Кардынал Дзяржсакратар адзначыў,
што ў Казахстане працавалі вялікія святары - сведкі веры: паходзячы з Закарпацця грэка-каталіцкі
біскуп Аляксандр Хіра (1897-1983), які прыняў біскупскае пасвячэнне таемна ў савецкім
ГУЛАГу і затым служыў вернікам розных каталіцкіх абрадаў Казахстана, а таксама Слуга
Божы кс. Уладзіслаў Букавінскі (1904-1974). Ад імя ўсяго Касцёла кардынал Дзяржсакратар
ўшанаваў памяць усіх тых, хто нястомна працаваў у Казахстане, прапаведуючы Евангелле.