Papa: nuk mund të jesh teolog në vetmi, por vetëm në bashkim me Kishën.
Nuk mund të jesh teolog në vetmi: këtë theksoi sot Papa, duke pritur, në Vatikan,
anëtarët e Komisionit Teologjik Ndërkombëtar, në përfundim të mbledhjes së tyre plenare.
Benedikti XVI nënvizoi, më pas, se idealet e drejtësisë e të barazisë demokratike
vdesin, në se u pritet rrënja, nga e cila lindën: krishterimi. Teologja është e
vërtetë, vetëm atëhere kur niset nga takimi me Krishtin e Ngjallur. Asnjë sistem teologjik
nuk mund të mbahet në këmbë, në se nuk përshkohet fund e krye nga dashuria hyjnore.
Në të vërtetë – pohoi Papa – kush zbulon në Krishtin dashurinë e Hyjit, të ndikuar
nga Shpirti Shenjt në zemrat tona, dëshiron ta njohë më mirë, me një dashuri të dyfishtë:
të Zotit për njeriun e të njeriut për Zotin: “Njohja dhe dashuria na mbështesin
fuqimisht. Ashtu si patën pohuar Etërit e Kishës, kush e do Zotin, nxitet për t’u
bërë në një farë mënyre, teolog, njeri që flet me Zotin, që mediton për Zotin e përpiqet
me të gjitha forcat të mendojë së bashku me Zotin”. Reflektimi teologjik,
falë racionalitetit – vijoi Papa - ndihmon në dialogun me besimtarët e feve të tjera,
e edhe me ata, që nuk besojnë. Kjo i krijon njeriut mundësinë të mendojë për Zotin
e edhe ta komunikojë atë që mendon, sepse Hyji na dhuroi arsyen, në harmoni me natyrën
e vet. Në se teologët dëshirojnë që metoda e tyre të jetë vërtet shkencore, përveç
procedimit racional, duhet t’i qëndrojnë besnikë natyrës së fesë kishtare, gjithnjë
në vazhdimësi, në dialog me besimtarët e edhe me teologët, që erdhën para nesh, sepse
teologu nuk nis nga zeroja. Prej këndej Benedikti XVI nënvizoi unitetin e domosdoshëm
ndërmjet teologëve e barinjve: “Nuk mund të jesh teolog në vetmi: teologët
kanë nevojë për shërbimin e barinjve në Kishë, ashtu si Papa ka nevojë për teologë,
që e kryejnë deri në fund të fundit shërbimin e tyre, me gjithë asketizmin që kërkon”. Krishti
vdiq për të gjithë, ndonëse jo të gjithë e njohin e e pranojnë - vërejti Ati i Shenjtë.
Pikërisht kjo fe na nxit t’u shërbejmë të gjithë njerëzve, në emër të Krishtit: me
fjalë të tjera, impenjimi shoqëror i të krishterëve është pasojë e dëftimit të dashurisë
hyjnore. Kundrimi i Hyjit të dëftuar dhe dashuria për të afërmin – përfundoi Papa
- nuk mund të ndahen, edhe pse jetojnë sipas karizmave të ndryshme: “Një
bote, që shpesh vlerëson shumë dhanti të krishterimit – si për shembull idenë e barazisë
demokratike... pa i kuptuar rrënjët e idealeve të veta, i duhet shpjeguar se frytet
bien nga dega, në se drurit i pritet rrënja. E kjo, sepse nuk ka drejtësi pa të
vërtetë, e drejtësia nuk e gjen plotësisht vetveten, në se horizonti i saj kufizohet
vetëm në botën materiale. Për ne, të krishterët, solidariteti shoqëror lidhet në mënyrë
të pazgjidhshme, me perspektivën e amshimit”.