Irak: arrestimi i përgjegjësve për sulmin në katedralen e Bagdadit nuk i bind të krishterët.
(30.11.2010 RV)“Vetëm gënjeshtra, sa për t’u dukur, për t’i bërë besimtarët
dhe bashkësinë ndëkombëtare të besojnë se qeveria e re irakiane po punon për t’i garantuar
sigurinë bashkësive fetare që përbëjnë pakicë në vend”. Ky është reagimi i bashkësisë
së krishterë irakiane ndaj lajmit të arrestimit të 12 terroristëve të atentatit në
katedralen e Bagdadit më 31 tetorin e kaluar. Më 27 nëntor forcat irakiane të sigurisë
njoftuan se kishin kapur një udhëheqës të Al-Kaedës dhe 11 njerëz të tij të përfshirë
në sulmet të ndryshme në kryeqytet. Bëhet fjalë për komandantin ushtarak të Al-Kaedës
në Bagdadin perëndimor Hudaifa Al-Bataui. Operacioni, sipas televizionit shtetëror
Irakia cituar nga agjencia Azianjuz, u krye më 24 nëntor. 12 të arrestuarit kanë pranuar
se janë përgjegjës për një varg atentatesh përfshi edhe atë në katedralen e Bagdadit
që shkaktoi 57 të vrarë. Gjatë operacionit të policisë u zbuluan edhe katër ndërtesa
ku përgatiteshin autobomba si edhe gjashtë ton lëndë shpërthyese. Sidoqoftë lajmi
nuk duket se i ka qetësuar aspak të krishterët irakianë. “Është gënjeshtër sepse na
kanë thënë se terroristët u vranë të gjithë gjatë operacionit të forcave speciale
për çlirimin e pengjeve në kishë” - u shprehën disa përfaqësues të bashkësisë së krishterë.”
Ndërkaq është dyfishuar numri i familjeve që po braktisin Bagdadin për të shkuar
në qytetin Sulajmania në veri të vendit.