У Ватыкане пачала працу Міжнародная тэалагічная камісія
Сёння ў Ватыкане пачалося
штогадовае пленарнае пасяджэнне Міжнароднай тэалагічнай камісіі, якое працягнецца
да 3 снежня. Камісію ўзначальвае прэфект Кангрэгацыі Веравучэння кардынал Уільям Левада,
а кіруе яе працай генеральны сакратар камісіі, швейцарскі дамініканін, рэктар Папскага
універсітэта імя св. Тамаша з Аквіну айцец Чарльз Марэрод. Удзельнікі сесіі будуць
прыняты на аўдыенцыі ў Святога Айца.
Як паінфармавала прэс-служба Апостальскай
сталіцы, камісія будзе разглядаць тры тэмы. Першая датычыць крыніц тэалогіі, яе сэнсу
і метадаў. Другая, сутнасці веры ў адзінага Бога ў адносінах да перакананняў іншых
монатэістычных рэлігій. Трэцяя праблема, якой зоймецца камісія: інтэграцыя сацыяльнага
навучання Касцёла ў больш шырокі кантэкст хрысціянскай навукі.