Një delegacion i Selisë së Shenjtë në Kostandinopojë për festën e Shën Andreut.
(29.11.2010 RV)Në kuadrin e shkëmbimeve të delegacioneve për festat e Shenjtorëve
Pajtorë: më 29 qershor, në Romë, për kremtimin e Shën Palit e të Shën Pjetrit apostuj
e më 30 nëntor, në Stamboll, për kremtimin e Shën Andreut, një delegacion i Vatikanit
arriti sot në Stamboll për festën e Patriarkanës Ekumenike. Kryesohet nga kardinali
Kurt Koch. Kryetari i Këshillit Papnor për nxitjen e bashkimit të të krishterëve -
nënvizon një komunikatë e Sallës vatikanase të Shtypit – shoqërohet nga ipeshkvi Brian
Farell, sekretar i dikasterit dhe nga i nderuari Andre Palmieri, nëpunës pranë Sektorit
Lindor të të njëjtit dikaster. Në Stamboll, me delegacionin do të bashkohet edhe nunci
apostolik në Turqi, kryeipeshkvi Antonio Lucibello. Delegacioni do të marrë pjesë
në Liturgjinë Hyjnore të festës së Shën Andreut, në Kishën e Shën Gjergjit në Fanar,
e cila konsiderohet si Vatikani i ortodoksëve. Do të takohet, më pas, me Patrikun
dhe do të bisedojë me anëtarët e Komisionit sinodal, të ngarkuar për marrëdhëniet
me Kishën katolike. Kujtojmë se katër vjet më parë, më 29 nëntor 2006, Ati i
Shenjtë ishte për vizitë në Turqi, ku u takua me vëllezërit e Lindjes. Papa pati ndjekur
me vëmendje të madhe Liturgjinë Hyjnore, kryesuar nga Bartolomeu I, duke ndjerë keqardhje
që nuk mund ta ndanin së bashku të njëjtën bukë e të njëjtin kelk. “Ne përkulemi
me përvujtëri e pendim – pati thënë Patriku Bartolomeu I – para Zotit tonë Jezu Krishtit,
sepse e kemi ndarë më dysh tunikën e Tij të endur një cope. Por nuk mungon edhe gëzimi
i ecjes së bashku në rrugën e dashurisë, si nxënës të Krishtit. E Patriku shprehu
gëzimin për praninë e vetë Papës, në Kishën motër, Kishë me numër të vogël, por me
nderim të madh. Është dashuria vëllazërore – iu përgjigj Papa në fjalimin e tij
– që e shtyu Pasardhësin e Shën Pjetrit të vijë në Kishën e themeluar nga i vëllai,
Andreu, apostulli, i cili u thirr i pari nga Jezusi. Është impenjimi për unitet, që
filloi në vitin 1964 nga Papa Pali VI e Atenagora, të cilët shfuqizuan – vijoi të
pohonte Papa – mallkimet tragjike të vitit 1054: “Ndasitë ekzistuese
ndërmjet të krishterëve janë shkandull për botën e pengesë për shpalljen e Ungjillit
– patipohuar Benedikti XVI. - Në prag të
mundimeve e të vdekjes, Zoti, i rrethuar nga nxënësit e vet, u lut me gjithë zemër
që ata të ishin një, kështu që bota të mund të besonte. Mesazhi i dashurisë së Zotit
për çdo burrë e çdo grua mund të bëhet i besueshëm vetëm përmes bashkimit vëllazëror
dhe dashurisë së anasjelltë ndërmjet të krishterëve”. Këtë qëllim ka edhe
prania e delegacionit të Vatikanit në Stamboll, në kremtimet e Shëna Ndreut 2010.