Մինսք-ի Խմբակի Համանախագահները Հանդիպում Ունեցան Նախագահ Սարգսեանի Հետ ։

Երէկ Պաքուէն Երեւան ժամանեցին ԵԱՀԿ-ի Մինսքի խմբակի համանախագահներ Ռոպըրթ Պրատքէ, Պեռնար Ֆասիէ, Իկոր Փոփով, ինչպէս նաեւ ԵԱՀԿ-ի գործող նախագահի անձնական ներկայացուցիչ Անճէյ Քասփրչիք։ Համանախագահները նախ հանդիպում ունեցան Հայաստանի արտաքին գործոց նախարար Էդուարդ Նալբանդեանի հետ։ Արտաքին գործոց նախարարութեան մամլոյ եւ տեղեկատուութեան վարչութիւնը կը փոխանցէ, որ մօտ կէս ժամ տեւած հանդիպումէն ետք միջնորդները նախարարին ներկայացուցին մէկ օր առաջ Պաքուի մէջ Ազրպէյճանի ղեկավարութեան հետ ունեցած քննարկումներու արդիւնքները եւ քննարկեցին Ասթանայի մէջ տեղի ունենալիք հանդիպումներու նախապատրաստական աշխատանքները։ Աւելի ուշ համանախագահները հանդիպում ունեցան Հայաստանի նախագահ Սերժ Սարգսեանի հետ։