Liturgjia e Fjalës e së dielës së parë të Ardhjes “A”
Ja përsëri në takimin tonë javor të së shtunës me Fjalën e Zotit të Liturgjisë së
dieles, kësaj rradhe – dëgjues të nderuar – do të dëgjojmë e meditojmë së bashku leximet
biblike të Liturgjisë së Fjalës së Zotit të dielës Parë të Kohës së Ardhjes, ciklit
të parë, sipas kalendarit të liturgjisë kishtare. Me këtë diele ne fillojmë një
Vit të Ri Kishtar, gjatë të cilit përmes Liturgjisë së Fjalës Hyjnore do të njihemi
çdo ditë, çdo të diele, çdo të kremte liturgjike me jetën, me veprën e porosinë e
Zotit tonë Jezu Krisht, Shpëtmtarit të mbarë njerëzimit.
Me këtë diele të parë
të kohës kishtare të quajtur të Ardhjes fillojmë përgatitjen tonë të veçantë shpirtërore
për kremtimin e Krishtlindjes, fillojmë pra parapërgatitjen për ta pritur Zotin që
i përshkon udhët tona njerëzore dhe që vjen vazhdimisht e pambarimisht në historinë
tonë duke kërkuar një zemër të gatshme njerëzore për të banuar, për t’u mishëruar.
Krishtlindja do të thotë pikërisht Mishërim i Zotit Jezu Krisht në natyrën tonë njerëzore
e në jetën tonë personale.
Krishtlinjdja është dëshmimi i faktit se Zoti e
ka përqafuar natyrën tonë njerëzore, se me dashuri Zoti i ka marrë mbi vete të gjitha
të mbetat tona njerëzore, të gjitha kufizimet, vështirësitë, mëkatet tona, të këqijat
pikërisht për të na liruar nga ky robërim vdekjepruerës shpirtëror e njerëzor.
Këtë Ai e ka realizuar përmes Dashurisë së Tij të pakufishme Hyjnore, të cilën e mishëroi
dhe e dëshmoi në Jezu Krishtin, i cili e dhuroi jetën e tij për jetën tonë duke vdekur
mbi Kryq dhe me Ngjalljen e Tij, do të thotë me ngadhënjimin e Tij përfundimtar mbi
të këqijat, mbi vdekjen dhe djallin e mallkuar na siguron ngadhënjimin tonë përfundimtar
në Të në Amshim.
E gjatë kësaj kohe shpirtërore të Ardhjes që do të zgjatë
për katër të diela Liturgjia e Fjalës së Zotit, na propozon disa personazhe apo figura
madhore biblike që na ndihmojnë e na prijnë në udhën e përgatitjes sonë shpirtërore
drejt Shpellës së Betlehemit për ta gjetur e pranuar në jetën tonë Emanuelin – Zotin
me ne: e këto personalitete janë Zoja e Bekuar, Vigjëra Mari, Izaia profet dhe Gjon
Pagëzuesi.
Liturgjia e kësaj së diele të parë të Ardhjes na thërret ta presim
Krishtin të zgjuar, të jemi të gatshëm e të aftë për ti njohur e kuptuar shenjat e
prezencës ( pranisë) së tij hyjnore mes nesh. Duhet të jemi të përgatitur, të gatshëm
sepse Zoti vjenë atëherë kur ne nuk e mendojmë dhe nuk e presim, pra, vjen paprimtas,
kështu që është mirë për ne, që kur të vijë Zoti në jetën tonë të na gjejë zgjuar
e të përgatitur për ta pranuar në zemrat tona. Koha e Ardhjes është përgatitje për
Krishtlindje por është edhe kohë e volitshme për t’ia kushtuar dëgjimit të Fjalës
së Zotit dhe e mbledhjes e bashkimit tonë përrethë saj, e cila është dritë për hapat
tanë në jetën e përdtishme.
Pra, tani ju ftoj ti dëgjojmë së bashku leximet
biblike të kësaj së diele, të cilat janë si një Letër që Zoti na dërgon secilit prej
nesh për të na përshëndetur dhe treguar dashurinë e tij që ka ndaj nesh dhe për të
komunikuar personalisht me ne. Po më tepër mbi Liturgjinë e Fjalës Hyjnore të kësaj
së diele të parë të Ardhjes e homelia e leximeve biblike nga dom Marjan Paloka,
mund ta dëgjoni këtu..…