Më 25 nëntor kalendari Kishtar përkujton Shën Katerinën e Aleksandrisë, virgjër e
martire.
Shenjtërimi i jetës dhe njohja e jashtëzakonshme e të vërtetave njerëzore e hyjnore.I
qe nënshtruar torturave të tmerrshme e mundimit të rrotës me thumba, pastaj i qe pre
koka. Trupi i Shën Katerinës qe bartur prej engjëjve mbi malin Sinai, aty disa murgjër
ndërtuar një manastir që ekziston ende sot.
Feja e Krishtit për tre shekuj
e parë luftohet e përndiqet, por megjithatë bën mrekullina. Kisha lavdëron betejat,
flijimet e dëshmitë e shenjtorëve. Dita e së kremtes së shenjtorëve quhet "ditë e
lindjes", sepse këtë ditë ata hynë fitimtarë në jetën e përjetshme të amshuar dhe
morën kurorën e pavdekshme të lavdisë.
E një nga figurat më të mëdha të Kishës
së lashtë është pa dyshim edhe Shën Katerina, lavdia e martirëve. Në të gjithë
botën u bë e njohur dhe e bekuar. Me trimërinë dhe guximin e saj për Krishtin, me
pastërtinë dhe dëlirësinë e saj të shkëlqyer tërhoqi shumë shpirtra në dritën e Jezu
Krishtit. U tregua banesë e Shpirtit të Shenjtë, nuse e Krishtit, Mbretit qiellor.
Kush i mendon të gjitha këto, i duket sikur futet brenda një parajse mendore, të mbushur
me lule virtytesh të mrekullueshme dhe të këndshme. "Ti na krijove, o Zot, dhe zemra
jonë është e shqetësuar deri sa të prehet tek Ti", shkruan shën Agostini.
Shën
Katerina lindi në Aleksandri në shek. e 3-të pas Krishtit. Ishte bijë e perandorit
Kostand, i cili kishte vdekur. Atëherë perandor ishte pagani Maksenti,më 305-313.
Shën
Katerina kishte një bukuri engjëllore dhe të pakrahasueshme. U edukua me kulturën
greke dhe njohu Homerin, Virgjilin, Aristotelin dhe Platonin. Studioi edhe librat
e shkencës mjekësore të Esklipit dhe të Hipokratit. Mësoi tërë retorikën. Të gjithë
e vlerësnon dhe admironin urtësinë e saj. Shumë krerë të pasur të senatit kërkuan
te nëna e saj të martoheshin me të. Nëna e saj ishte një e krishterë e fshehtë nga
përndjekja që kishte filluar Maksimiliani Daia kundër besimtarëve të krishterë. Të
afërmit dhe nëna e saj e këshillonin të martohej që të mos kalonte mbretëria e të
atit në dorë të ndonjë të huaji. Por Shën Katerina megjithë pasuritë, lavdinë dhe
nderimet që kishte, dëshironte të jetonte në virgjëri. Mirëpo, kur pa që e shqetësonin
dhe insistonin, u tha: "Gjeni një të ri i cili të ketë lavdi, pasuri, bukuri dhe
urtësi, sepse nuk pranoj të marr një më të ulët se veten". Nëna e saj kishte një
atë shpirtëror të shenjtë, i cili jetonte si oshëran jashtë qytetit, në një vendqëndrim
të shkretë. Mori atëherë Katerinën dhe shkuan të këshilloheshin. Ati shpirtëror i
dëgjoi fjalët e saj të urta. Ai mendoi ta tërhiqte në besimin e Krishtit dhe i tha: "Njoh
një njeri të mrekullueshëm që të kalon në të gjitha dhuntitë dhe në të tjera gjëra
të pallogaritshme. Bukuria e tij mund në shkëlqim diellin. Urtësia e tij sundon gjithësinë.
Pasuria e tij shpërndahet në të gjithë botën. Mirësjellja e tij, prejardhja e tij
është e papërshkrueshme".
Vajza mendoi se ai thoshte për ndonjë person të shquar
të kësaj bote dhe pyeti: "I biri i kujt është që ka kaq shumë cilësi të mira?" Ai
u përgjigj: "Ky i ri nuk ka atë në këtë botë. Lindi në mënyrë mbinatyrore nga një
virgjër e e shenjtë dhe shumë e sjellshme, e cila u vlerësua nga shenjtëria e saj
të mbetet e pavdekshme në shpirt dhe trup. U ngjit në qiell. Lutet për të gjithë;
shenjtorë dhe engjëj e nderojnë si mbretëreshë të gjithë krijesës." "Eshtë e mundur
ta shikoj këtë të ri për të cilin tregon kaq gjëra të mrekullueshme?" "Në qoftë
se bën çfarë do të them, do bëhesh e denjë të shohësh fytyrën e Tij të ndritshme." "Të
shikoj një njeri me mend dhe të respektueshëm. Besoj tek ato që më thatë". Atëherë
ati shpirtëror i dha një ikonë të Shën Marisë Virgjër me Foshnjën Hyjnore në krahë
dhe i tha: "Kjo është virgjëra e shenjtë, Nëna e Tij. Merre këtë ikonë dhe pasi të
mbyllësh derën e dhomës tënde, lutu gjatë tërë natës. Lutju me besim Nënës së Tij,
e cila quhet Mari, që të të tregojë Birin e saj. Atë që dëshiron zemra jote. Lutjet
e ngrohta ngjiten si temjam përpara fronit të Tij."
Katerina u mrekullua nga
fjalët e njeriut oshënar . Mori ikonën dhe shkoi në pallat. Gjithë natën u mbyll në
dhomë dhe lutej me përzemërsi. Nga lodhja fjeti. Atëherë sheh në vegim Shën Marinë
dhe Foshnjën Hyjnore. E papërshkrueshme qe lavdia dhe bukuria e tyre! Ndritnin më
shumë se dielli. Krishti kishte kthyer fytyrën e Tij drejt së ëmës. Atëherë dëgjoi
Shën Marinë të thotë me zë të ëmbël: "Shiko, Biri im, shërbëtoren tënde sa e bukur
dhe e mirë që është". Foshnja Hyjnore u përgjigj: "Eshtë e errët dhe e shëmtuar.
Nuk mund ta shoh fare". Shën Maria i thotë përsëri: "A nuk është më e urtë nga
të gjithë oratorët? E pasur dhe e sjellshme!" "Nëna ime, ajo është e paditur dhe
e varfër. Nuk mund ta shikojë fytyrën time." Të lutem, Biri im i dashur, mos e
përbuz krijesën tënde, por jepi mundësi të shikojë lavdinë tënde dhe fytyrën tënde
hyjnore që dëshirojnë engjëjt ta shikojnë." "Le të shkojë tek prifti që i dha ikonën.
Le të bëjë çfarë ta këshillojë ai. Atëherë do të më shikojë." Në mëngjes Katerina
shkoi e shoqëruar me pak gra te prifti oshënar. Me lot i tregoi vegimin dhe kërkoi
këshillën e tij. Oshënari foli për misteret e mrekullueshme të besimit të krishterë.
Foli për bukuritë e papërshkrueshme të parajsës Hyjnore. E ftoi afër kryqit të tij.
"Këtë
orë të qetë të fton Zoti! Të bëhesh fener i ndritshëm në kishën e tij. Që shumë shpirtra
të tjerë të gjejnë rrugën e shpëtimit nga rrezatimi yt. Nga rruga e përulësisë e përvujtërisë
do të udhëhiqesh në pallatet qiellore". Katerina besoi me gjithë zemrën e saj.
"I
bekuar është Zoti i të Krishterëve. Dua të bëhem e krishterë që të ndjek Jezu Krishtin.
Të luftoj për mbretërinë e Tij!" Ajo pranoi pagëzimin e shenjtë.
Nga Dorotea
që quhej (me të vërtetë dhuratë e Zotit ishte), mori emrin Katerina, që do të thotë
"tri kurora". Të tri kurorat ishin: ajo e urtësisë, e pastërtisë shpirtërore dhe e
martirizimit. Atëherë, ndërsa shenjtëresha nxori njeriun e vjetër dhe veshi njeriun
e ri dhe stolinë e Zotit, shkoi në pallat dhe gjithë natën lutej e pangrënë dhe me
lot, derisa e zuri gjumi.
Atëherë pa në vegim Shën Marinë me Foshnjën Hyjnore
që shikonte Katerinën me shumë mirësi. Nëna e Zotit pyeti Krishtin, nëse ishte e pëlqyeshme
vajza. Krishti u përgjigj:
"Tani u bë e lavdishme dhe e pasur dhe me shumë
urtësi. Eshtë stolisur me kaq dhunti, saqë meriton të bëhet Nusja ime e përjetshme".
Atëherë
Katerina ra në tokë me lot, duke thënë:
"Nuk jam e denjë, o Zot i shumëlavdishëm,
të vij në mbretërinë Tënde qiellore, por më bëj të denjë të bashkërenditem me shërbëtorët
e Tu".
Shën Maria mori dorën e djathtë të vajzës dhe tha:
"Jepi, Biri
im, unazën e fejesës, dhe bëje të denjë të hyjë e lavdishme në Mbretërinë Tënde. Atëherë,
Zoti i dha një unazë shumë të bukur, duke thënë:
"Që sot do të jesh Nusja ime
e përjetshme. Do të jesh afër meje, fener i ndritshëm që do të udhëheqësh shpirtra
të pavdkeshëm dhe të çmuar në mbretërinë Time të përjetshme".
Që nga ai çast
Katerina iu kushtua Nuse Dhëndrit qiellor dhe u mbush zemra e saj me dashuri hyjnore
për të ëmblin Krisht.
Çfarë lumturie gjejnë shpirtrat që njohin Krishtin dhe
lidhen me të përjetësisht!
Të krishterët e Aleksandrisë e pritën Katerinën
me himne dhe me këngë shpirtërore. Katerinën nuk e emociononin gëzimet e kota të botës.
Me vullnet të shenjtë filloi të punonte për lavdinë e Krishtit.
I flaktë dëgjohej
predikimi i saj hyjnor që jepte gëzim dhe lehtësim. Ishte engjëll ngushëllues i të
varfërve, i të sëmurëve dhe i të mjerëve.
Përpara Mbretit Maksent
Atë
kohë, mbreti Maksent nxori këtë urdhër: "Unë, mbreti Maksent, ftoj të gjithë sa janë
nën pushtetin tim, të mblidhen në tempull që të nderojnë perënditë e mëdha. Kush përbuz
urdhrin tim, do të dënohet ashpër."
Atëherë, u mblodh një mori njerëzish që
të bënin therrore për perënditë e rreme. Mbreti solli theror 130 dema, ndërsa zotërinjtë
e tjerë më pak. Shën Katerina shikonte këtë mashtrim të frikshëm në të cilin binin
njerëzit. E nxitur nga vullneti hyjnor, mori disa të krishterë dhe shkoi në tempullin
pagan. Qëndroi tek dera dhe bukuria e saj engjëllore tërhoqi shikimet e të gjithëve.
Lajmëroi pastaj mbretin se kishte diçka të rëndësishme për t'i thënë. Mbreti urdhëroi
të afrohej. Katerina u përkul dhe me guxim i tha: "Duhet në fillim ti, o mbret,
të njihje mashtrimin që keni, duke adhuruar si zotër idhujt. Eshtë turp të luteni
për krijesa të rreme. Një është Zoti! I përjetshëm dhe i pavdekshëm, i cili për shpëtimin
tonë u bë njeri. Ky Zot i plotfuqishëm nuk ka nevojë për therore të tilla, por vetëm
do që të mbajmë porositë e tij."
"Na ler të mbarojmë me theroret dhe pastaj
do të dëgjojmë fjalët e tua", tha mbreti.
Kur mbaroi therori i pakuptimshëm
e ftoi Shenjtoren në pallat dhe i tha: "Më trego ç'janë dhe ç'nënkuptojnë fjalët që
the?"
"Unë jam bija e ish-mbretit Kostand, quhem Katerina dhe kam studiuar
oratori, filozofi dhe shkencat e tjera. Por të gjitha këto i përbuza dhe u bëra e
krishterë, Nusja e Zotit Krisht".
Mbreti admiroi urtësinë dhe bukurinë e saj.
Kujtoi se ishte ndodnjë hyjni nga ato që adhuronte. Mbreti e shfaqi këtë mendim dhe
e shenjta iu përgjigj:
"Mbret jam prej balte dhe argjili. Zoti më gatoi dhe
më nderoi me ikonën e tij dhe me shembëllesën e tij. Në qoftë se do të shkallmosh
errësirën dhe mashtrimin, do të njohësh Hyjin e vërtetë.
Emri i Tij zhduk perënditë
e tua dhe, nëse dëshiron, mund të ta vërtetoj". Mbreti, duke parë diturinë e Shenjtores
u frikësua mos e mundte dhe tha: "Eshtë e padenjë të diskutojë mbreti me gra. Do të
ftoj oratorët e mi të urtë dhe atëherë, do të besosh ato që them unë", dhe urdhëroi
të burgosnin martiren. Shenjtorja e qetë u tha: "Rrojmë qetë, kur jemi në padukje
për Zotin Krisht".
Bashkëbisedim me oratorët
Martirizimi i oratorëve
Mbreti
dërgoi letra në gjithë qytetet e pushtetit të tij. "Unë, mbreti, përshëndes gjithë
të urtët dhe oratorët paganë. Ju ftoj të vini këtu shpejt, që t'i mbyllni gojën një
vajze të urtë që mohon perënditë tona. Pregatituni me kujdes të ndesheni burrërisht.
Mos neglizhoni për faktin se keni të bëni me një grua. Tregoni urtësinë tuaj, sepse
nga sa e pashë unë, ajo ia kalon dhe Platonit të shquar për dituri." Kur tha kështu
mbreti, një orator, më i shquari ndër ta, tha: "Edhe sikur të jetë gruaja më e
urtë e botës do të mundet, po të diskutojë me ne. Urdhëro që të vijë"
Maksenti
ishte plot me gëzim, duke shpresuar që do të mundte urtësinë e vajzës të mbushur me
hirin hyjnor.
Atëherë urdhëroi të silnin martiren. Ishin shumë njerëz të mbledhur
në teatër për të parë përfundimin.
Por, përpara se të arrinin të dërguarit
tek Katerinaa, zbriti nga qielli Kryeengjëlli Mihill i rrethuar me një dritë qiellore
dhe i tha: "Mos u tremb, bijë e Zotit, sepse Zoti do të të japë urtësi në urtësinë
tënde që të mundësh të 150 oratorët. Jo vetëm këta, por dhe shumë të tjerë, do të
besojnë me anën tënde e të merrni të gjithë kurorën e martirit". Kur u paraqit
përpara të urtëve Katerina, oratori që i kishte thënë mbretit se do të fitonin, i
tha: - Ti je ajo që mohon perënditë tona? - Unë jam, - i tha qetë Katerina.
Gjithmonë fliste me mirësi dhe ëmbëlsi. - Poetët tanë të mëdhenj i quajnë të pavdekshëm,
si guxon ti dhe i mohon? Ti që njohe urtësinë e tyre? - Urtësinë time ma fali Zoti
im, i cili është Burimi i urtësisë. Perënditë tuaja nuk ekzistojnë. Krishti është
gjithë dashuri dhe i fton të gjithë afër Tij! Oratori tha: - Mos u mashtro ti
e tërëurta ta lutësh të Kryqëzuarin. Katerina u përgjigj: - I Kryqëzuari është
Hyji i vërtetë, Krijuesi i gjithë botës. U bë njeri për ne. Ndenji i uritur dhe i
etur për shpëtimin tonë. Mësoi të tjerët, bëri mrekullira, pranoi dhe vdekjen për
të zgjidhur dënimin tonë dhe hapi dyert e parajsës. Kërkoni me gjithë shpirt Zotin
dhe do të përtërihet shpirti juaj. Do mbushet me ngushëllim, lehtësim dhe guxim. Eshtë
i vetmi që nuk na braktis kurrë. Krishti është pasioni i zemrës sime. Na fton afër
Tij: "Ejani të gjithë sa jeni të lodhur dhe unë do t'ju jap prehje". Nuk do të vonohem
tju vij në ndihmë dhe përkujdesje. "I madh është Zoti ynë dhe mrekulli bëri e djathta
e Tij". Të gjitha kalojnë, vetëm pamja e Jezusit ngelet në shekuj!
Me fjalë
të mbushura me urtësi, çuditi e gjithëurta filozofin, i cili mbeti pa zë.
Mbreti,
duke e parë atë të mposhtur, urdhëroi të tjerët të diskutojnë me martiren, por ata
thanë:
- Nuk mund t'i bëjmë ballë të vërtetës, madje, duke parë të mposhtur
dhe kryetarin tonë.
Atëherë mbreti u inatos. Urdhëroi të ndiznin zjarr në qendër
të qytetit dhe të digjnin oratorët. Filozofët, që dëgjuan vendimin, ranë te këmbët
e Katerines duke iu lutur t'i falte Zoti për ato që mëkatuan nga padija. Tani besonin
tek Zoti i vërtetë dhe dëshironin të pagëzoheshin dhe të merrnin Hirin e Shpirtit
të Shenjtë.
Fytyra e Shenjtores mbetet e ndritshme dhe paqësore. Ishte kaq
e urtë, sa asnjë lloj krenarie nuk tregoi për fitoren e saj. Shën Katerina, mbushur
me gëzim hyjnor, u tha:
- Lum ju, sepse latë errësirën dhe ndoqët dritën e
së vërtetës. Latë mbretin e vdekshëm të tokës dhe erdhët tek i Pavdekshmi dhe Qiellori.
Ecni drejt atdheut qiellor. Zjarri, që ju frikëson, do të bëhet pagëzim dhe shkallë
qiellore. Do t'ju pastrojë shpirtin nga çdo njollë dhe trupin tuaj. Si yje të ndritshëm
do t'u çojë tek Mbreti qiellor, i cili do t'ju bëjë të lumtur, sepse nga fortuna e
kësaj jete shkoni në atdheun e përjetshëm.
Këto tha Katerina dhe u bëri të
gjithëve shenjën e Kryqit të nderuar në ballë. Mos u trembni, dëshmuat në emër të
Tij.
- Do merrni kurorën e fitores nga Mbreti i shekujve. Ecni në paqen e Zotit!
Ushtarët
hodhën oratorët në zjarr më 17 nëntor. Mbasdite shkuan disa njerëz shpresëtarë të
mbledhin trupat. I gjetën të gjitha të padëmtuara dhe të plota. Zjarri nuk i kishte
djegur. Shpirtrat e tyre u ngjitën në paqe drejt qiellit. Kjo është pika e parë e
miqësisë së tyre me Hyjin. Me këtë mrekulli shumë besuan në Krishtin dhe lavdëronin
emrin e Tij. Varrosën martirët me shumë lavde e nderime në një vend të përshtatshëm.
Martirizimi dhe burgosja e Shenjtores
Mbreti e kishte gjithë mendjen
te Shenjtorja. Nga që nuk mundi ta mposhte me argumente filozofike, u mundua ta bindte
atë me premtime duke thënë: - Më dëgjo, o e urta princeshë, të këshilloj si baba
i dashur dhe i dhimbsur t'u falesh perëndive dhe sidomos Hermesit që të stolisi me
dhuntitë e filozofisë. Do të të jap gjysmën e mbretërisë time. Do të jetosh bashkë
me mua te pallatet. Shenjtorja, si e matur që ishte, iu përgjigj: - Mbret, mos
u bëj hipokrit. Unë jam e krishterë. Erdha të bëhem Nuse e Krishtit, të cilin e kam
të vetmin Dhëndër dhe këshillues, stoli dhe zbukurim të jetës sime të falur Virgjërore.
Dëshiroj mundimin më shumë se çdo purpur mbretëror dhe kurorë. Nuk do ndahem nga Shpëtimtari
im i ëmbël Krisht. Këto tha dhe ngriti lart Kryqin që mbante. Mbreti u egërsua
dhe u përgjigj: - Mos më detyro të fyej pa dashur vlerën tënde. Lëre këtë pikë. -
Mos më frikëso. Kryqi është simboli i fitores. Do të më jetë shok i burgut tim dhe
i martirizimit tim. Me pikëllimet e përkohshme po më dhuroni lavdi të pavdekshme.
Do të besojnë shumë njerëz te Krishti im. Gjithashtu dhe nga pallati juaj do të besojnë
dhe do të më dërgojnë në ato banesa të shenjta të parajsës. Çfarë dobi do të keni,
në qoftë se fitojmë gjithë botën? Çdo gjë është si ëndërr. Të gjitha do të kalojnë.
Kështu
tha Katerina. Zoti e bekoi nga lart dhe u përmbush profecia e saj. Atëherë mbreti
urdhëroi t'i hiqnin purpurin mbretëror dhe ta rrihnin egërsisht, pa mëshirë. I binin
fort për dy orë rresht, deri sa i çanë trupin e pastër. Gjaku rridhte papushim dhe
skuqte tokën. Shenjtorja qëndronte me kaq burrëri dhe trimëri, sa të gjithë e admironin.
Sytë e saj shikonin lart. Shpirti i saj donte të shkonte te Krishti, por ora e saj
nuk kishte ardhur akoma.
Në darkë Maksenti dha urdhër ta burgosnin dhe të mos
i jepnin bukë dhe ujë për dymbëdhjetë ditë, deri sa të mendohej se me çfarë mënyre
ta vdiste.
Mbretëresha dhe Porfirioni besojnë tek Krishti
Faustina,
e shoqja e mbretit, kishte dëshirë të njihte Katerinën. Gjeti rast, atëherë, kur mungonte
nga qyteti i shoqi. Ftoi komandantin e kampit Porfirin dhe i tha mendimin e saj dhe
vegimin që pa: - Natën e kaluar pashë në vegim Katerinën që qëndronte midis shumë
virgjëreshave të reja, të veshura me stoli të bardhë. Aq shkëlqim vinte nga fytyra
e saj, saqë nuk mund ta shikoja. Kur më pa, më uli pranë saj dhe më vuri në kokë kurorë
të artë duke më thënë: "Zoti Krisht ju dërgon këtë kurorë". Të lutem Porfir, të gjesh
mënyrën ta vizitoj këtë vajzë. - Do ta plotësoj dëshirën tënde zonjë, - u përgjigj
ai. Ndërsa ra nata, mori Porfirin dhe njëzet ushtarë dhe shkuan në burg. Atje brenda,
në errësirë, pa Augusta pamjen e dëshiruar të martires, të rrethuar me Hirin e shkëlqyeshëm
Hyjnor. U mahnit nga bukuria e saj dhe shkëlqimi i fytyrës së saj. Ra ne këmbët e
Shenjtores me lot duke thënë: - Tani jam me fat dhe e lumtur, sepse të njoha. Dëshiroja
të shikoja fytyrën tënde dhe isha e etur si dreri të dëgjoja fjalët e tua të ëmbla.
Tani, dhe nëse lë jetën dhe mbretërinë time, nuk do të mërzitem. Kënaqet zemra ime
që merr nga pamja jote e bukur një dritë të re, sikur të agojë një agim i ri i ëmbël.
Je e lumtur dhe plot zell, sepse beson një Zot të tillë, nga i cili merr kaq dhurata
dhe hire. - E lumtur je dhe ti, mbretëreshë, se shikoj engjëjt e shenjtë të vënë
në kokën tënde kurorë të ndritshme. Do ta marrësh pas tri ditëve me pak tortura që
do durosh dhe do shkosh tek Mbreti i vërtetë, të mbretërosh përjetë. - Kam frikë
nga torturat dhe për tim shoq Maksent, sepse është shumë i ashpër kundër të krishterëve. -
Ki guxim, brenda zemrës tënde, për besimin që ke, do të banojë Krishti. Do të të forcojë
në orët e vështira të torturave. Këtu përkohësisht do të vuash, por atje lart, do
gëzosh dhe do prehesh përjetë. Shenjtorja, kur fliste, kishte shprehjen e një engjëlli
të frymëzuar. Atëherë Porfiri pyeti Katerinën: - Çfarë meritash fal Krishti
për ata që besojnë tek Ai? Dua dhe unë ta njoh dhe të bëhem ushtar i Tij. - Nuk
mundet gjuha të rrëfejë meritat që fal Krishti dhe sa të tjera që Zoti Njeridashës
ka përgatitur për ata që duan dhe zbatojnë porositë e Tij Hyjnore. Krishti zotëron
fronin më të lartë. Mbështetuni në Përkujdesjen e Tij Hyjnore, në duart e Tij të plotfuqishme
dhe do të gjeni prehjen e jetës pa mbarim. Përgatitni stolinë për nusëroren e Zotit.
Ejani afër Mësuesit që sakrifikoi jetën për ne. Mos u grindni për gjërat e kota të
botës. Me lindjen e Diellit Hyjnor do të shndrisin shpresëtarët e Zotit dhe të drejtët.
Le të lartësohet shpirti ynë në bukuritë e përjetshme të parajsës.
Ushqim nga
Hyji. Tortura të reja.
Krishti i mëshirshëm nuk e braktisi Katerinën. I dërgonte
ushqim çdo ditë me një pëllumb. Pastaj vetë Zoti erdhi dhe e vizitoi me shumë lavdi
bashkë me ushtrinë e Tij qiellore. Forcoi durimin e saj dhe i dha guximin duke i thënë: -
Katerina, mos u tremb, jam bashkë me ty! Shiko titujt dhe kurorat e fitimtarëve. Me
durimin tënd do të tërheqësh shumë në emrin Tim dhe do të fitosh shumë kurora. Këto
i tha Ai Shenjtores natën e fundit. Në mëngjes pasi u ul mbreti në fronin e tij,
urdhëroi të sillnin martiren para tij. Shën Katerina shkoi në pallat e mbushur me
Hirin Hyjnor dhe me ndriçimin e ëmbël të fytyrës, saqë, ata që ishin rreth saj, habiteshin.
Por edhe mbreti, kur e pa, u habit. Priste ta shikonte të dobësuar dhe e pa të ndriçuar
nga Hiri i Shenjtë. Mendoi të dënonte rojet, por Shenjtorja i tha: - Asnjë njeri,
mbret, nuk më dha ushqim. Më ushqente Zoti im Jezu Krisht, i cili kujdeset për shërbëtorët
e tij. Mbreti u çudit me atë hir dhe ndriçim që kishte dhe donte ta mposhtëte me
premtime, duke thënë: - Për ty ia vlen mbretëria, o vajzë e bukur. Ti ia kalon
dhe perëndive nga bukuria. Eja të sjellësh therore për perënditë. Do të bëhesh mbretëreshë.
Do të ngjitesh në fronin tim. Mos jep shkak që bukuria jote të humbasë në tortura. Shenjtorja
u përgjigj: - Unë jam tokë dhe argjil. Çdo bukuri si lule vyshket dhe si ëndërr
zhduket ose nga sëmundja, ose nga pleqëria, ose nga vdekja. Unë i përkas Krishtit
tim. Zemra ime është e mbushur me flakën hyjnore të dashurisë së Tij. Kur fliste
Katerina, një prefekt i quajtur Hurrasaden, tha: - Unë, mbret, gjeta një metodë
me të cilën një vajzë do të mundet, dhe të vdesë me një vdekje të ashpër. Të urdhërosh
të bëjnë katër rrota prej druri. Rreth tyre të ngulin brisqe dhe hekura të mprehtë.
Dy nga rrotat të lëvizin djathtas dhe dy të tjerat majtas dhe në mes të vendosin të
lidhur këtë të krishterë. Kështu duke lëvizur rrotat ta shqyejnë tërësisht. Mbreti
e pëlqeu mendimin e tij dhe, për tri ditë, rrotat u ndërtuan. Atëherë, mbreti i
tha Katerinës: - I shikon këto rrota? Do të marrësh një vdekje të hidhur, në qoftë
se nuk u falesh perëndive. - Ta thashë shumë herë vendimin tim. Dashuroj mbi të
gjitha Krishtin tim. Mos humb kohën, - u përgjigj Shenjtorja me guxim. Atëherë
e lidhën Shenjtoren tek rrotat. Katerina shikonte drejt qiellit dhe lutej. Zëri i
saj si vesë mistike dëgjohej përreth. - 0 Jezusi im, Shpëtimtari im, mos më braktis.
Këtu në tokë sa e madhe është dhimbja, sa i rëndë është Kryqi. O Krishti im, shpresa
ime e ëmbël, strehim i sigurt, qëndro me mua. Atëherë një ndriçim hyjnor ndriçoi
zonën. Melodi engjëjsh u dëgjuan. Çfarë bukurie! U shfaq Zoti! - Katerinë, guxim,
jam afër teje Unë, Jezusi, mos u përkul. Të përcaktova në Kishën time si shembull
virtyti dhe urtësie. Për pak do të gjendesh në atdheun e përjetshëm. Shiko tingujt
e fitimtarëve. - 0 Zot, në këtë lartësi më caktove? Eja, o Jezu, mos u vono; shpirti
im ka etje për Ty. Atje lart si ndriçon nuk mund ta shpjegojë. Zot, dëgjoj vazhdimisht
zërin Tënd të më ftojë. Kërkon të kemi dashuri me njëri-tjetrin dhe të falim ata që
na urrejnë. - Dëgjo, Katerinë, qëndro besnike tek Unë. Eja këtu tek gëzimi i përjetshëm.
Eja tek Ati. - Po, Krishti im, le ta dëgjoj zërin tënd që më fton. Si të përshkruaj
melodinë qiellore të engjëjve? Atje, në vendin Tënd qiellor, çfarë harmonie dhe mirësie
mbretëron! Për të gjitha këto madhështi që na përgatite, çfarë të dhurova, o Zot? -
Katerinë, më fale gjakun dhe jetën tënde. Eja në qytetin qiellor. Atëherë një engjëll
i Zotit u shfaq brenda një drite hyjnore, i cili e ndihmoi Shenjtoren. E zgjidhi nga
prangat. Hiri hyjnor e ruajti Shenjtoren të plotë dhe të padëmtuar nga rrotat. Ata
që gjendeshin aty, kur e panë këtë mrekulli të çuditshme, thërritnin: - I madh
është Zoti i të krishterëve!
Martirizimi i mbretëreshës Kur mësoi ngjarjet,
mbretëresha Augusta doli nga dhoma e saj dhe me guxim qortoi mbretin: - Me të vërtetë,
ti lufton Hyjin e vërtetë të të krishterëve dhe torturon shërbëtoret e tij, - i tha. Kur
dëgjoi mbreti këto fjalë të pabesueshme, u bë më i egër se përbindëshat. La Katerinën
dhe u kthye nga e shoqja. Augusta dëshmoi për Krishtin me guxim dhe atëherë, mbreti
urdhëroi t'i pritnin kokën. Ajo e pranoi me gëzim vendimin dhe i tha Shenjtores: -
Shërbëtore e Zotit së vërtetë, lutu për mua. Shko në paqe Augusta, të mbretërosh
me Krishtin Përjetë. Mbretëreshës së lumtur iu pre koka më 23 nëntor të vitit 305
pas Krishtit. Shpirti i saj, me martirizimin, u ngjit plotësisht i bardhë drejt qiejve.
Komandanti i kampit Porfiri shkoi në fshehtësi natën me ushtarët e tij dhe e varrosën
lipsanin e nderuar të saj.
Martirizimi i Porfirit dhe i ushtarëve besimtarë Në
mëngjes, mbreti donte të dënonte përgjegjësit e varrimit. Atëherë u paraqit Porfiri
me ushtarët e tjerë në gjyq, duke thënë: - Dhe ne jemi të krishterë, ushtarë
të Perëndisë së vërtetë. Atëhere mbreti mori frymë thellë dhe tha: - U fika, humba
Porfirin e mrekullueshëm, komandantin e kampit. Po dhe ju, o ushtarë, përbuzët perënditë
atërore? Urdhëroi që, Porfirit dhe dyqind ushtarëve t'u pritet koka. Ishte 24 nëntor.
Martirizimi
i fundit i Shenjtores Të nesërmen, sollën Katerinën në gjyq. Mbreti me pikëllim
i thotë: - Duhej të të kisha ekzekutuar, por të fal, që të mos humbi një vajzë
e bukur dhe e tërëurtë. Sillu therore perëndive dhe do të të bëj mbretëreshë.
-
Pse më premton kot, o mbret. Jeta dhe lavdia e kësaj bote nuk më gënjen. Unë, Perëndinë
dhe Zotin tim të përjetshëm, nuk e mohoj. Asgjë nuk më ndan nga Ti, o Dhëndër Qiellor.
Le të himnizojë shpirti ynë Zotin.
Maksenti dha urdhër t'i prisnin kokën jashtë
qytetit. Morën Shenjtoren ushtarët dhe e çuan në vendin e ekzekutimit. Me qetësi hyjnore
martirja e madhe me trimëri shkonte drejt sakrificës. E ndiqnin shumë njerëz, burra
, gra, fëmijë të vegjël. Të gjithë qanin dhe vajtonin me hidhërim. Shenjtorja e qetë,
u fliste:
- Mos qani, vëllezërit e mi. Vdes për të jetuar përjetë. Shkoj te
Krishti im, te Kreu i martirëve, i cili është për ta bukuria dhe lavdia. Na fton te
bukuritë e papërshkruara të parajsës. Në qoftë se si njerëz jetojmë në këtë botë,
si të krishterë i përkasim një bote tjetër të përjetshme. Atje lart në qytetin qiellor
do t'i lutem Zotit për ju. Do t'i kërkoj të dërgojë dritën e Tij, që të arrijë për
të gjithë ora e faljes. Atëherë, të gjithë do të takohemi në një dritë më të ndritshme
afër fronit të Zotit.
Shenjtorja shpërtheu në një vajtim pa zë. Kur arriti
në vendin e martirizimit, iu kthye të gjithëve me mirësi dhe, me sa fuqi kishte, tha
ngadalë:
- Sot, vëllezërit e mi, nga kjo jetë largohem dhe drejt botës së përjetshme
shkoj. Tani erdhi ora e largimit tim. Me dashurinë të rroni që tani e tutje, vetëm
me dashurinë. Krishti të jetë e vetmja mbështetje dhe shpresë për ju. O Zoti Krisht,
a më fton? Lum të ftuarit në darkën e Zotit. Të faleminderit që vdes si martire për
Ty! Me gëzim mbaroj rrugën time dhe dhiakoninë që mora për të pohuar emrin tënd. Le
të mbretërojë paqja te vëllezërit dhe le të udhëhiqen të gjithë në kopshtet e përjetësisë
në atdheun qiellor.
Në atë kohë u dëgjuan zërat e idhujtarëve:
- Në
vdekje po të çojmë, ku është Hyji yt? Mohoje atë se nuk ekziston.
Shën Katerina
i shikon me mirësi, ngre duart me prangat e rënda lart dhe u thotë:
- Ekziston
shpresa që është reale, ekziston dashuria që është e përjetshme, ekziston Zoti që
është më i fortë mbi të gjithë.
Fytyra e saj mbetet paqësore dhe e ndritshme.
Ngre lart shikimin e saj dhe thotë lutjen e fundit në tokë:
- Zot Jezu Krisht,
të faleminderit që drejtove hapat e mi drejt Teje. Zgjat duart e Tua të Shenjta, o
Zot, për ne që u plagosën në Kryq. Prano shpirtin tim që ndahet sot nga dashuria për
Ty. Falmi fajet e bëra nga padija ime. Laji ato me gjakun që derdhe për ne dhe për
martirizimin tim. Mbaj trupin tim të padukshëm nga ata që e kërkojnë. Ruaje ku Ti
vetë dëshiron, o mbreti im. Shtjer sytë nga lartësia Jote, Zot, mbi këtë popull që
gjendet këtu. Udhëhiqi në dritën Tënde. Bëj, o Zot, që të të njohin të gjithë. Jepu,
o Zot, atyre që për mua ftojnë emrin Tënd të Shenjtë, duke kërkuar shpëtimin. Që të
lartësohet emri Yt hyjnor dhe i Atit e i Shpirtit të Shenjtë, në jetë të jetëve. Amen.
Pastaj
pa me qetësi, dhe besimtarëve që e ndiqnin u tha:
- Vdekja është fillimi i
përjetësisë. Të doni Kishën, e cila ju udhëheq te Kryeprifti i përjetshëm. Të lutem,
o Zot, atyre që kërkojnë ndihmën time t'ua japësh dhe t'ua plotësosh kërkesat. Dhe
uli kokën.
Xhelati ngriti lart shpatën, o çfarë çasti i tmerrshëm! dhe preu
kokën e saj të nderuar me 25 nëntor të vitit 305 pas Krishtit. Përreth u përhap qetësi,
ngjitet në lartësinë e qiellit Shën Katerina. Një ndriçim hyjnor ndriçoi zonën, u
dëgjuan himne engjëllorë. Trupi i martirizuar pret vizitorë qiellorë. Erdhën engjëjt
dhe me shumë respekt morën trupin e nderuar dhe u ngritën lart mbi tokë. Me himne
hyjnore, engjëjt përcollën trupin e shenjtë dhe e vendosën në majën më të lartë të
malit Sina. Besimtarët e krishterë, që shikonin të përcillej Shenjtorja në lartësi,
u gjunjëzuan dhe me psalme thonin: "Cili Hyj është aq i madh sa Hyji ynë? E madhe
është fuqia Jote, o Krisht, fuqia e martirëve të Tu".
Trupi i nderuar mbeti
për shekuj lart në majën e malit Sina. Në shek. e 6-të, në kohën e Justinianit, perandorit
të Bizantit, u ndërtua manastiri në malin Sina. Murgjit në majë shikonin dritë. Me
mundim u ngjitën dhe gjetën trupin e shenjtë të paprishur dhe me miro. Me himne e
përcollën në manastirin e malit Sina, i cili që atëherë mori emrin e saj. Trupi i
shenjtë i Shën Katerinës deri sot lëshon miro dhe është burim mrekullish. Kështu i
lavdëron Zoti ata që Atij i thurin lavde. Kjo është jeta e Shën Katerinës, e së shenjtës
dhe të urtës. E dashuroi Zotin Jez Krisht me gjithë zemrën e saj dhe sakrifikoi të
gjitha për lavdinë e Tij. Tani, në lavdinë e qiellit, përjetësisht, lutet për të gjithë
ne. Fitimtare dhe trime është mes nesh Shën Katerina. Fener i krishterimit. Kujtimi
i saj festohet ditën e martirizimit të saj më 25 nëntor. Dëshitarja e madhe Shën Katerina,
pas kaq përpjekjesh dhe luftrash gëzon tani qetësi të përjetshme, pas një ndeshjeje
aq të madhe, ajo tani gëzon fitoren e përjetshme. "Cili Hyji është aq i madh sa Hyji
ynë!"