Keqardhja e Papës për shugurimin e një ipeshkvi në Kinë, pa mandat apostolik: plagos
bashkimin e Kishës.
(24.11.2010 RV)Ati i Shenjtë mori, me keqardhje të thellë, lajmin që flet për
shugurimin ipeshkvnor të të nderuarit Jozef Gua Çingçai. Shugurimi u kremtua të shtunën
e kaluar, më 20 nëntor, në Çendè, në provincën kineze të Hebei-t. Shugurimi -
shkruhet në një notë të Sallës vatikanase të Shtypit - u kremtua pa mandat apostolik
e, prandaj, duhet konsideruar si plagë që dhemb në bashkimin kishtar e, jo më pak,
edhe si shkelje e disiplinës katolike. Dihet - shkruhet më tej në notën e Sallës
së Shtypit - se ditët e fundit, ipeshkvij të ndryshëm, iu nënshtruan presioneve dhe
kufizimeve të lirisë së lëvizjes, me qëllim që të detyroheshin për të marrë pjesë
në kremtim e për të dhënë sakramentin e shugurimit ipeshkvnor. Kufizime të tilla nga
ana e autoriteteve qeveritare e atyre të sigurimit të shtetit kinez - nënvizohet në
notë - përbëjnë një dhunim të rëndë të lirisë së fesë e të ndërgjegjes. Selia e Shenjtë
ruan të drejtën të përgjigjet më vonë, pasi ta ketë vlerësuar thellësisht ngjarjen,
ndërmjet tjerash, edhe në këndvështrimin e vlerës së shugurimit dhe të pozitës kanonike
të ipeshkvijve, që morën pjesë në të. Sidoqoftë, nënvizohet, kjo peshon, në radhë
të parë, mbi të nderuarin Jozef Gua Çingçai i cili, si pasojë e këtij shugurimi ipeshkvnor,
ndodhet në një gjendje tejet të rëndë kanonike përballë Kishës në Kinë e Kishës universale,
duke pasur parasysh edhe masat jo të lehta ndeshkimore që parashikohen, në mënyrë
të veçantë nga neni 1382 i Kodit të së Drejtës Kanonike. Një shugurim i tillë -
vijon nota - jo vetëm që nuk i ndihmon katolikët e Çende-së, por i vë në kushte tejet
delikate e të vështira, sipas profilit kanonik, e edhe i poshtëron, sepse autoritetet
kineze duan t’u imponojnë atyre një bari, i cili nuk është në bashkim të plotë as
me Atin e Shenjtë e as me ipeshkvijtë e tjerë, të shpërndarë në mbarë botën. Më
se një herë - kujtohet në notë - Selia e Shenjtë u komunikoi qartë autoriteteve kineze
se nuk ishte dakord për shugurimin e të nderuarit Jozef Gua Çingçai. E megjithatë
autoritetet kineze vendosën të veprojnë në mënyrë të njëanshme, në dëm të atmosferës
së respektit me Selinë e Shenjtë e Kishën katolike, të krijuar me aq mundim. Preteksti
për ta vënë veten mbi ipeshkvijtë e për ta udhëhequr jetën e bashkësisë kishtare -
lexohet në notë - nuk përkon me doktrinën katolike, fyen Atin e Shenjtë, Kishën në
Kinë e Kishën universale, duke i thelluar më tej vështirësitë aktuale baritore.Selia
e Shenjtë - shtohet në notë - ripohon gatishmërinë për të dialoguar me autoritetet
kineze, me qëllim që të kapërcehen vështirësitë e të normalizohen marrëdhëniet, por
konstaton me keqardhje se autoritetet lejojnë që udhëheqja e Shoqatës Patriotike Katolike
Kineze, nën ndikimin e zotit Liu Bainian, të kryejë veprime, që e dëmtojnë rëndë Kishën
Katolike dhe e pengojnë seriozisht këtë dialog. Katolikët e mbarë botës - përfundon
nota - e ndjekin me vëmendje të veçantë ecjen e mundimshme të Kishës në Kinë: solidariteti
shpirtëror, me të cilin i shoqërojnë ngjarjet e vëllezërve e motrave kineze, bëhet
lutje e zjarrtë drejtuar Zotit të historisë, që t’u qëndrojë pranë, t’ua mbajë gjallë
shpresën e t’i ngushëllojë në çastet e provës.